ഇന്ത്യ ഇറാഖിലേയ്ക്ക് സൈന്യത്തെ അയയ്ക്കില്ല
ദില്ലി: ഇന്ത്യ ഇറാഖിലേയ്ക്ക് ഇപ്പോള് സൈന്യത്തെ അയയ്ക്കണ്ടെന്ന് തീരുമാനിച്ചു. ഐക്യ രാഷ്ട്രസഭ ഈ ആവശ്യം ഉന്നയിയ്ക്കുകയാണെങ്കില് അപ്പോള് പരിഗണിയ്ക്കാമെന്നാണ് സര്ക്കാര് തീരുമാനിച്ചത്.
ജൂലൈ 14 തിങ്കളാഴ്ച ചേര്ന്ന സുരക്ഷയ്ക്കായുള്ള മന്ത്രിസഭാ സമിതിയാണ് ഈ തീരുമാനമെടുത്തത്. വ്യക്തമായി ഐക്യരാഷ്ട്രസഭ ഈ ആവശ്യം ഉന്നയിച്ചാല് അപ്പോള് മാത്രം ഇന്ത്യ ഇറാഖിലേയ്ക്ക് സേനയെ അയയ്ക്കുന്നത് പരിഗണിയ്ക്കാമെന്ന് യോഗം തീരുമാനിച്ചതായി വിദേശ കാര്യമന്ത്രി യശ്വന്ത് സിന്ഹ വ്യക്തമാക്കി.
അമേരിയ്ക്ക ഇന്ത്യന് സേനയെ ഇറാഖിലേയ്ക്ക് അയയ്ക്കാന് ആവശ്യപ്പെട്ടിരുന്നു. കഴിഞ്ഞ ഒരുമാസമായി ഇതിനെക്കുറിച്ച് ചൂടുപിടിച്ച വിവാദങ്ങള് നടക്കുകയായിരുന്നു. സൈന്യം അയയ്ക്കാന് ഇന്ത്യ ഉദ്ദേശിയ്ക്കുന്നില്ലെങ്കിലും ഇറാഖിന്റെ വികസനത്തിനായി വേണ്ടത് ചെയ്യാന് രാജ്യം ഒരുക്കമാണെന്ന് യോഗത്തിന് ശേഷം പുറപ്പെടുവിച്ച കുറിപ്പില് വ്യക്തമാക്കിയിട്ടുണ്ട്. അടിസ്ഥാന സൗകര്യങ്ങള്, വൈദ്യം, ആരോഗ്യം, വിദ്യാഭ്യാസം, വാര്ത്താ വിനിമയം എന്നീ രംഗങ്ങളില് ഇറാഖ് ജനതയെ സഹായിയ്ക്കാന് ഇന്ത്യ തയ്യാറാണ്.
ഇതിന്റെ മുന്നോടിയായി ഇറാഖിലെ നജാഫ് എന്ന സ്ഥലത്ത് ഒരു ആശുപത്രി സ്ഥാപിയ്ക്കാന് നീക്കങ്ങള് നടത്തുന്നുണ്ടെന്നും യശ്വന്ത് സിന്ഹ പറഞ്ഞു.