മന്ത്രിസഭ പുന:സംഘടിപ്പിച്ചേയ്ക്കും

കൊച്ചി: സംസ്ഥാനഭരണം കാര്യക്ഷമമാക്കാന്‍ ജൂലൈ 18ന് ശേഷം മന്ത്രിസഭ പുന:സംഘടിപ്പിച്ചേയ്ക്കുമെന്നറിയുന്നു.

മുഖ്യമന്ത്രി എ.കെ. ആന്റണിയെ മാറ്റണമെന്ന ദില്ലിയ്ക്ക് പോയ ഐ ഗ്രൂപ്പ് പ്രതിനിധികളുടെ ആവശ്യം ഹൈക്കമാന്റ് തള്ളിക്കളഞ്ഞിരുന്നു. ഈ സാഹചര്യത്തില്‍ ആന്റണിയെ മാറ്റിയില്ലെങ്കിലും മന്ത്രിമാരെ മാറ്റുന്നതുമായി സഹകരിച്ച് നീങ്ങാനാണ് ഐ ഗ്രൂപ്പ് ശ്രമിയ്ക്കുക. കരുണാകരനെതിരെ മറുകണ്ടം ചാടിയ കെ.വി. തോമസിനെ മാറ്റാനോ അതല്ലെങ്കില്‍ പകരം ഒരു മന്ത്രിസ്ഥാനം കൂടുതലായി ലഭിയ്ക്കാനോ അവസരമൊരുങ്ങിയാല്‍ തന്നെ അത് ഐ ഗ്രൂപ്പിനെ സംബന്ധിച്ചിടത്തോളം വലിയ കാര്യമാണ്. മാത്രമല്ല, അസംതൃപ്തരായ വിവിധ ഗ്രൂപ്പുകളെ മന്ത്രിസഭാ പുന:സംഘടനയിലൂടെ ശാന്തരാക്കാമെന്ന് ആന്റണിയും കണക്കുകൂട്ടുന്നു.

എന്തായാലും കോണ്‍ഗ്രസ് മന്ത്രിമാരില്‍ നല്ലൊരു വിഭാഗം പേരെ മാറ്റിപ്രതിഷ്ഠിച്ചേക്കുമെന്നാണ് സൂചന. ഐ ഗ്രൂപ്പിലെ മന്ത്രിമാരായ കടവൂര്‍ ശിവദാസന്‍, പി. ശങ്കരന്‍ എന്നിവരെ ഐ ഗ്രൂപ്പ് തന്നെ മാറ്റും. എ ഗ്രൂപ്പിലെ മന്ത്രിമാരായ ശങ്കരനാരായണന്‍, ഡോ.എം.എ. കുട്ടപ്പന്‍, എം.എം. ഹസ്സന്‍ എന്നിവരെയും മാറ്റാന്‍ സാധ്യതയുണ്ട്. നാലാം ഗ്രൂപ്പില്‍ നിന്നും മന്ത്രിയായ സുധാകരനെ മാറ്റാന്‍ വയലാര്‍ രവിയുടെ നേതൃത്വത്തില്‍ കേന്ദ്രത്തില്‍ സമ്മര്‍ദ്ദമുണ്ട്.