ജല അതോറ്റിറ്റി കുപ്പിവെള്ളം വില്ക്കുന്നു
തിരുവനന്തപുരം: ജല അതോറിറ്റി ശുദ്ധീകരിച്ച വെള്ളം കുപ്പികളിലാക്കി വിപണിയിലെത്തിക്കാനൊരുങ്ങുന്നു. ഇതിനായി സ്വകാര്യ കമ്പനികളെ ഏല്പിക്കാനാണ് നീക്കം.
സംസ്ഥാനത്തെ നാല് കേന്ദ്രങ്ങളോട് അനുബന്ധിച്ച് കുപ്പിവെള്ളം നിറയ്ക്കാനുള്ള സംവിധാനമൊരുക്കാനാണ് പദ്ധതി. സ്വകാര്യ കമ്പനികളെയായിരിക്കും ഇതേല്പിക്കുക. ദിവസേന 50,000 ലിറ്റര് വെള്ളം കുപ്പിയിലാക്കും. ഒരു കുപ്പിയില് നിന്ന് ജല അതോറിറ്റിക്ക് ഒരു രൂപ വരുമാനം ലഭിക്കുമെന്നാണ് പ്രതീക്ഷിക്കുന്നത്.
കുപ്പിവെള്ളം വില്ക്കുന്നത് ഒമ്പത് രൂപയ്ക്കായിരിക്കും. ഇപ്പോള് വിപണിയില് ലഭിക്കുന്ന കുപ്പിവെള്ളത്തിന് 10 മുതല് 12 രൂപ വരെയാണ് വില. അക്വാ കൈരളി എന്ന പേരിലായിരിക്കും കുപ്പിവെള്ളം വിപണിയിലെത്തിക്കുന്നത്.
തിരുവനന്തപുരം, പിറവം, ആലുവ, കോഴിക്കോട് എന്നിവിടങ്ങളിലായിരിക്കും ആദ്യം കുപ്പിവെള്ളം നിറയ്ക്കാനുള്ള സംവിധാനമൊരുക്കുന്നത്. 60 ലക്ഷം രൂപയായിരിക്കും വാട്ടര് അതോറിറ്റിക്ക് ഇതുവഴി വരുമാനമായി ലഭിക്കുക.
എന്നാല് ഇപ്പോഴത്തെ കുടിവെള്ള വിതരണത്തെ പദ്ധതി ബാധിക്കുമോയെന്ന ആശങ്കയുണ്ട്. കുടിവെള്ളക്ഷാമം രൂക്ഷമാവുന്ന വേനല്ക്കാലത്തും കുടിവെള്ളം നിറയ്ക്കല് തുടര്ന്നാല് അത് കുടിവെള്ള വിതരണത്തെ ബാധിച്ചേക്കും.