ബസ് നിരക്ക് കൂട്ടില്ലെന്ന് മന്ത്രി

തിരുവനന്തപുരം: കെ എസ് ആര്‍ ടി സി, സ്വകാര്യ ബസ് നിരക്ക് വര്‍ധിപ്പിക്കില്ലെന്ന് ഗതാഗതമന്ത്രി ആര്‍. ബാലകൃഷ്ണപിള്ള നിയമസഭയില്‍ അറിയിച്ചു.

ബജറ്റിലെ ധനാഭ്യര്‍ഥന ചര്‍ച്ചക്ക് മറുപടി പറയുകയായരുന്നു അദ്ദേഹം. ചെലവ് കുറച്ചും കാര്യക്ഷമത കൂട്ടിയും കെ എസ് ആര്‍ ടി സിയുടെ പ്രവര്‍ത്തനം മെച്ചപ്പെടുത്താനുള്ള ശ്രമം നടന്നുവരികയാണ്.

കഴിഞ്ഞ അഞ്ച് വര്‍ഷമായി നഷ്ടത്തിലോടുന്ന കെ എസ് ആര്‍ ടി സിയില്‍ മെയ് അവസാനത്തില്‍ 50 ലക്ഷത്തിന്റെ പ്രവര്‍ത്തന ലാഭമുണ്ടായി. യു ഡി എഫ് സര്‍ക്കാര്‍ അധികാരത്തില്‍ വരുമ്പോള്‍ കെ എസ് ആര്‍ ടി സിയുടെ മൊത്തം നഷ്ടം 574 കോടിയായിരുന്നു. അത് 370 കോടിയായി കുറയ്ക്കാന്‍ സാധിച്ചിട്ടുണ്ട്.

കെ എസ് ആര്‍ ടി സിയുടെ വരുമാനം കൂട്ടാന്‍ കൂടുതല്‍ റൂട്ടുകള്‍ ദേശസാല്‍ക്കരിക്കേണ്ടതുണ്ട്. 2004 മാര്‍ച്ച് അവസാനത്തോടെ 800 ഹൈ ടെക് ബസുകളും 100 മിനി ബസുകളും കെ എസ് ആര്‍ ടി സി നിരത്തിലിറക്കും.

എല്ലാ ആര്‍ ടി ഓഫീസുകളിലെയും ഡ്രൈവിംഗ് ലൈസന്‍സ് പരീക്ഷകള്‍ കമ്പ്യൂട്ടര്‍വത്കരിക്കും. ഈ പദ്ധതിക്കായി വിപ്രോയെ കണ്‍സള്‍ട്ടാന്റായി നിയമിച്ചിട്ടുണ്ട്.