പ്ലാസ്റിക് ബാഗുകള്‍ നിരോധിക്കും

തിരുവനന്തപുരം: പ്ലാസ്റിക് ബാഗുകള്‍ നിരോധിക്കുന്നത് പരിഗണനയിലാണെന്ന് തദ്ദേശസ്വയംഭരണമന്ത്രി ചെര്‍ക്കളം അബ്ദുള്ള നിയമസഭയില്‍ അറിയിച്ചു. മന്ത്രിസഭ ഇക്കാര്യം അടുത്തുതന്നെ പരിഗണിക്കും.

40 മൈക്രോണില്‍ താഴെ കനമുള്ള പ്ലാസ്റിക്ക് ബാഗുകള്‍ നിരോധിക്കണമെന്ന് മലിനീകരണ നിയന്ത്രണ ബോര്‍ഡ് നിര്‍ദേശിച്ചിരുന്നതാണ്. ഇതിന്റെ അടിസ്ഥാനത്തിലുള്ള ഉത്തരവ് കോടതി സ്റേ ചെയ്തത് നീക്കിക്കിട്ടാന്‍ നടപടി സ്വീകരിക്കും.

അതിനിടെ നിയമസഭാ മന്ദിരത്തിലും പ്ലാസ്റിക് ഉപയോഗിക്കുന്നത് നിയമസഭാംഗങ്ങള്‍ ചൂണ്ടിക്കാട്ടി. നിയമസഭാ മന്ദിരത്തില്‍ അലങ്കാര വസ്തുക്കളായി ധാരാളം പ്ലാസ്റിക് പൂക്കള്‍ വച്ചിരിക്കുന്നതിനെതിരെയാണ് വിമര്‍ശനമുയര്‍ന്നത്.

പ്ലാസ്റിക് പൂക്കള്‍ നിയമസഭയില്‍ അലങ്കരിക്കാന്‍ ഉപയോഗിക്കാനായി വാങ്ങിയത് തന്റെ മുന്‍ഗാമിയുടെ കാലത്താണെന്ന് സ്പീക്കര്‍ വക്കം പുരുഷോത്തമന്‍ പറഞ്ഞു. നിയമസഭാ വളപ്പില്‍ പ്ലാസ്റിക് ഉടന്‍ നിരോധിക്കുമെന്നും അദ്ദേഹം അറിയിച്ചു.

പ്ലാസ്റിക് ഉപേക്ഷിക്കുന്നതിന് ജനങ്ങളെ ഉപദേശിക്കുന്നതിന് മുമ്പ് നിയമനിര്‍മാതാക്കള്‍ സ്വയം മാതൃകയാവണമെന്ന് മുഖ്യമന്ത്രി എ. കെ. ആന്റണി പറഞ്ഞു.