ഇറാഖ്: യുഎസ് സൈനികരില് മുറുമുറുപ്പ്
ബാഗ്ദാദ്: ഇറാഖില് നിന്നും എന്ന് മടങ്ങാനാവുമെന്നത് സംബന്ധിച്ച് ഉറപ്പ് ലഭിയ്ക്കാത്തതിനാല് യുഎസ് പട്ടാളക്യാമ്പുകളില് മുറുമുറുപ്പ് ഉയരുന്നു. യുഎസ് കോണ്ഗ്രസ്സില് ഇതിന്റെ പേരില് പ്രസിഡന്റ് ബുഷിനെതിരെ പ്രതിപക്ഷം അതിശക്തമായ വിമര്ശനം അഴിച്ചുവിടുന്നു.
ഇറാഖില് ഇപ്പോള് 16,000 യുഎസ് പട്ടാളക്കാരാണ് ക്യാമ്പ് ചെയ്യുന്നത്. അതിശക്തമായ ചൂട് ഇവരെ തളര്ത്തുന്നു. ഒപ്പം സദ്ദാം പക്ഷക്കാരില് നിന്നുള്ള ആക്രമണവും പട്ടാളക്കാരെ വലയ്ക്കുന്നു. യുദ്ധം അവസാനിച്ചതായി ബുഷ് പ്രഖ്യാപനം നടത്തിയ മെയ് ഒന്നിന് ശേഷം ഇതിനകം 80 ഓളം യുഎസ് പട്ടാളക്കാരാണ് വിവിധ ആക്രമണങ്ങളില് ബാഗ്ദാദില് കൊല്ലപ്പെട്ടത്.
ഇറാഖിലേക്ക് പട്ടാളത്തെ അയയ്ക്കാന് ഇന്ത്യ വിസമ്മതിച്ചതും യുഎസിനെ തളര്ത്തി. ഇറാഖിലെ സമാധാനദൗത്യം ഇന്ത്യയിലെ പട്ടാളക്കാരെ ഏല്പിച്ച് യുഎസ് സേനയെ പടിപടിയായി പിന്വലിയ്ക്കാനായിരുന്നു യുഎസ് പദ്ധതി. എന്നാല് ഈ പദ്ധതി പാളി.
അമേരിക്കക്കാര്ക്ക് ഇറാഖിലേക്ക് യാത്ര ചെയ്യുന്നതിനുള്ള എല്ലാ നിയന്ത്രണങ്ങളും യുഎസ് കഴിഞ്ഞ ദിവസം നീക്കി. ഇറാഖിലെ താല്ക്കാലിക ഭരണകൂടം യുദ്ധത്തില് പിടികൂടിയ സദ്ദാം പക്ഷക്കാരെ വിചാരണ ചെയ്യുന്നതിന് പ്രത്യേക കൗണ്സില് രൂപീകരിച്ചുകഴിഞ്ഞു.
കഴിഞ്ഞ ദിവസം ബാഗ്ദാദിന് പടിഞ്ഞാറ് റമാദിയിലുള്ള യുഎസ് പട്ടാളക്യാമ്പിന് നേരെ നടന്ന ഗ്രനേഡ് ആക്രമണവും പട്ടാളക്കാരില് ഞെട്ടലുണ്ടാക്കിയിട്ടുണ്ട്. എന്തായാലും 2003 ഡിസംബറോടെ മാത്രമേ യുഎസ് പട്ടാളക്കാര്ക്ക് ഇറാഖില് നിന്ന് മടങ്ങാനാവൂ എന്നാണ് പെന്റഗണ് നല്കുന്ന സൂചന.