രാജീവ് ഗാന്ധിയുമായി അകന്നു: ബച്ചന്
ദില്ലി: ഏറെ അടുപ്പം ഉണ്ടായിരുന്ന രാജീവ് ഗാന്ധിയുടെ കുടുംബവുമായി എപ്പോഴോ താന് അകന്നുവെന്ന് ബോളിവുഡ് നടന് അമിതാഭ് ബച്ചന്. രാജീവ് ഗാന്ധിയോടൊപ്പം ഡൂണ് സ്കൂളില് സഹപാഠിയായിരുന്നു അമിതാഭ് ബച്ചന്. ഒരു സ്വകാര്യ ടെലിവിഷന് ചാനല് സംപ്രേഷണം ചെയ്ത അഭിമുഖത്തിലാണ് ബച്ചന് ഈ വെളിപ്പെടുത്തല് നടത്തിയത്.
മാത്രമല്ല, ബോഫോഴ്സ് കേസില് രാജീവ് ഗാന്ധി കോഴ വാങ്ങിയെന്ന് താന് കരുതുന്നില്ലെന്നും ബച്ചന് ചൂണ്ടിക്കാട്ടി. തനിക്ക് വളരെ അടുപ്പം ഉണ്ടായിരുന്ന ഗാന്ധി കുടുംബവുമായി ഒരു ഘട്ടത്തില് താന് അകന്നുവെന്ന് ബച്ചന് പറഞ്ഞു.
അവര് ദില്ലിയിലായിരുന്നു. ഞങ്ങള് മുംബൈയിലും. ഞങ്ങളുടെ ജീവിതവും ബന്ധങ്ങളുടെ രീതിയും വ്യത്യസ്തമായിരുന്നു. തീര്ച്ചയായും ഞങ്ങള്ക്കിടയില് ഒരകല്ച്ച ഉണ്ടായി. പക്ഷെ ഒരിയ്ക്കലും ഗാന്ധി കുടുംബത്തെ മറക്കാന് കഴിയില്ലെന്നും അവരെ എപ്പോഴും ഓര്മ്മിയ്ക്കുമെന്നും ബച്ചന് പറഞ്ഞു.
അതേ സമയം ബോഫോഴ്സ് കേസില് ഒരിയ്ക്കലും രാജീവ്ഗാന്ധിയും കുടുംബവും പണം വാങ്ങിയെന്ന് താന് കരുതുന്നില്ലെന്നും ബച്ചന് പറഞ്ഞു. എനിയ്ക്കും എന്റെ കുടുംബത്തിനും എതിരെ ആരോപണമുണ്ടായി. പക്ഷെ ഞങ്ങള് അതിനെ ചെറുത്തു. - ബച്ചന് പറഞ്ഞു.
രാഷ്ട്രീയത്തില് നിരാശയുണ്ടായോ എന്ന ചോദ്യത്തിന് രാഷ്ട്രീയത്തിന് പറ്റിയ ആളല്ല താനെന്ന് തിരിച്ചറിയുകയായിരുന്നുവെന്ന് ബച്ചന് പറഞ്ഞു. ഒരു കാലത്ത് സുഹൃത്തായ രാജീവ് ഗാന്ധിയുടെ നിര്ബന്ധത്തിന് വഴങ്ങിയാണ് അമിതാഭ് ബച്ചന് കോണ്ഗ്രസ് രാഷ്ട്രീയത്തില് ഇറങ്ങിയത്.
ഞാന് രാഷ്ട്രീയത്തിന് ചേരുന്നയാളല്ല. അതിന് വേണ്ട അടിസ്ഥാനയോഗ്യതയും ഇല്ല. - ബച്ചന് പറഞ്ഞു. രാജീവ് ഗാന്ധിയും രാഷ്ട്രീയത്തിന് ചേര്ന്നയാളല്ലേ എന്ന ചോദ്യത്തിന് രാഷ്ട്രീയകുടുംബത്തില് ജനിച്ച രാജീവ് ഗാന്ധിയെക്കുറിച്ച് അങ്ങിനെ പറയാന് കഴിയില്ലെന്ന് ബച്ചന് പറഞ്ഞു. സമൂഹത്തിന്റെ അധപതനത്തിന് ഏക പോംവഴി സൈനിക പരിശീലനമാണെന്ന് ബച്ചന് സൂചിപ്പിച്ചു.
നാഷണല് ഡിഫന്സ് അക്കാദമി, മിലിറ്ററി അക്കാദമി എന്നീ രണ്ട് സ്ഥാപനങ്ങള് മാത്രമേ രാജ്യത്ത് അച്ചടക്കവും വ്യക്തിത്വവും കാത്തുസൂക്ഷിയ്ക്കുന്ന രണ്ട് സ്ഥാപനങ്ങളെന്നും കുറഞ്ഞത് ആറ് മാസമെങ്കിലും ഇവിടങ്ങളില് എല്ലാവര്ക്കും പരിശീലനം നല്കണമെന്നും ബച്ചന് പറഞ്ഞു.