കായല്മഞ്ജം വിദേശവിപണിയിലേക്ക്
ആലപ്പാട്: കെട്ടുവള്ളങ്ങള് നിര്മ്മിയ്ക്കുന്നതില് പ്രശസ്തരായ കായല്മഞ്ജം ഇനി വിദേശവിപണി ലക്ഷ്യമാക്കി നീങ്ങുന്നു. തങ്ങളുടെ കെട്ടുവള്ളങ്ങള്ക്കായി വിദേശരാജ്യങ്ങളില് നിന്നും താല്പര്യമുള്ള വ്യവസായികളെ കണ്ടെത്താനുള്ള ശ്രമത്തിലാണ് കായല്മഞ്ജം.
കെട്ടുവള്ളങ്ങള് നിര്മ്മിയ്ക്കുന്ന ജില്ലയിലെ ഏകകേന്ദ്രമാണ് കായല്മഞ്ജം. സാധാരണ കെട്ടുവള്ളങ്ങളുടെ പ്രതാപം നഷ്ടപ്പെട്ടതോടെയാണ് ടൂറിസ്റുകള്ക്ക് വേണ്ടിയുള്ള പരിഷ്കരിച്ച കെട്ടുവള്ളങ്ങള് കായല്മഞ്ജം നിര്മ്മിച്ചുതുടങ്ങിയത്.
രണ്ട് തരം കെട്ടുവള്ളങ്ങളാണ് ഇപ്പോള് കായല്മഞ്ജം നിര്മ്മിയ്ക്കുന്നത്. രണ്ട് കിടക്കമുറിയുള്ള കെട്ടുവള്ളത്തിന് 12 ലക്ഷം രൂപ ചെലവ് വരും. ഒരു കിടക്കമുറിയുള്ള കെട്ടുവള്ളത്തിന് ഏഴ്ലക്ഷവും. വിശാലമായ സ്വീകരണമുറി, കായല് സൗന്ദര്യം ആസ്വദിയ്ക്കാനുള്ള പ്രത്യേക മുകള്ത്തട്ട്, അടുക്കള, ഊണ്മുറി, ടോയ്ലറ്റ്, ഷവര്ബാത്ത് എന്നിവ കെട്ടുവള്ളത്തിലുണ്ട്.
മൂന്ന് വിഭാഗം തൊഴിലാളികളാണ് ഇവിടെയുള്ളത്. മരപ്പണി, മേല്ക്കൂരനിര്മ്മാണം, മുറികള് വേര്തിരിച്ചുള്ള അലങ്കാരപ്പണി എന്നിവയ്ക്ക് പ്രത്യേകം പ്രത്യേകം വൈദഗ്ധ്യമുള്ള തൊഴിലാളികള്.