കടല്ക്ഷോഭം: കേന്ദ്രത്തോട് ഫണ്ട് ആവശ്യപ്പെട്ടു
തിരുവനന്തപുരം: കടല്ക്ഷോഭം തടയുന്നതിന് ദേശീയ തീരദേശ സംരക്ഷണ പദ്ധതിയുടെ കീഴിലായി 219.96 കോടി രൂപ അനുവദിക്കണമെന്ന് കേന്ദ്രത്തോട് ആവശ്യപ്പെട്ടതായി ജലസേചനമന്ത്രി ടി. എം. ജേക്കബ് നിയമസഭയെ അറിയിച്ചു.
ജൂലൈ 24 വ്യാഴാഴ്ച ഒരു സബ്മിഷന് മറുപടി പറയുകയായിരുന്നു ജേക്കബ്. ഫണ്ടിന് അനുമതി ലഭിക്കുമെന്നാണ് പ്രതീക്ഷിക്കുന്നതെന്ന് അദ്ദേഹം പറഞ്ഞു.
ആലപ്പുഴ, തിരുവനന്തപുരം, കാസര്കോട് എന്നിവിടങ്ങളിലാണ് കടല്ക്ഷോഭം കൂടുതല് ശക്തമായി അനുഭവപ്പെട്ടത്. കടല്ക്ഷോഭം തടയുന്നതിനായി താത്കാലിക നടപടികള് സ്വീകരിച്ചിട്ടുണ്ട്. കടല്ഭിത്തി നിര്മിക്കുന്നതും കടല്ഭിത്തി പുനര്നിര്മാണവും പുരോഗമിച്ചുവരികയാണ്.
കടല്ക്ഷോഭം മൂലം ദുരിതമനുഭവിക്കുന്ന കുടുംബങ്ങള്ക്ക് സഹായമെത്തിക്കാന് അടിയന്തിര നടപടികള് സ്വീകരിക്കണമെന്ന് പ്രശ്നമുന്നയിച്ച പ്രതിപക്ഷ നേതാവ് വി. എസ്. അച്യുതാനന്ദന് ആവശ്യപ്പെട്ടു.