മാറാട്: രണ്ട് പ്രത്യേക കോടതികള്‍ വരും

തിരുവനന്തപുരം: മാറാട് സംഭവവുമായി ബന്ധപ്പെട്ട കേസുകള്‍ കൈകാര്യം ചെയ്യുന്നതിന് രണ്ട് പ്രത്യേക കോടതികള്‍ സ്ഥാപിക്കുന്നതിന് മന്ത്രിസഭായോഗം തീരുമാനിച്ചു.

ഒരു സ്പെഷല്‍ അഡീഷന്‍സ് സെഷന്‍സ് കോടതിയും ഒരു സ്പെഷല്‍ ജുഡീഷ്യല്‍ ഒന്നാം ക്ലാസ് മജിസ്ട്രേറ്റ് കോടതിയുമായിരിക്കും സ്ഥാപിക്കുക. കോടതികളുടെ ആസ്ഥാനം കോഴിക്കോടായിരിക്കും.

സമീപകാലത്ത് ആദ്യമായാണ് ഇത്തരം കോടതികള്‍ സംസ്ഥാനത്ത് സ്ഥാപിക്കുന്നതെന്ന് മുഖ്യമന്ത്രി എ. കെ. ആന്റണി പറഞ്ഞു. പ്രത്യേക കോടതികള്‍ നിലവില്‍ വരുന്നതോടെ കേസുമായി ബന്ധപ്പെട്ട നടപടികള്‍ വേഗത്തിലാക്കാനാവും.

മാറാട് സംഭവത്തെ കുറിച്ച് അന്വേഷിക്കാന്‍ സിറ്റിംഗ് ഹൈക്കോടതി ജഡ്ജിയെ ലഭ്യമാക്കാന്‍ ബുദ്ധിമുട്ടുണ്ടെന്ന് ചീഫ് ജസ്റിസ് അറിയിച്ചിട്ടുണ്ട്. അതിനാല്‍ ഒരു സീനിയര്‍ സിറ്റിംഗ് ജില്ലാ ജഡ്ജിയുടെ സേവനം ലഭ്യമാക്കാന്‍ ആവശ്യപ്പെട്ടിട്ടുണ്ട്.