സദ്ദാമിന്റെ മക്കളുടെ ചിത്രം പുറത്തുവിട്ടു
ബാഗ്ദാദ്: യുഎസ് സേന വെടിവച്ച് കൊന്നുവെന്ന് അവകാശപ്പെട്ട സദ്ദാമിന്റെ മക്കളായ ഖുസെയുടെയും ഉദയിന്റെയും ചിത്രങ്ങള് യുഎസ് ബാഗ്ദാദില് പുറത്തുവിട്ടു. സദ്ദാമിന്റെ യുഗം അവസാനിച്ചുവെന്ന് ഇറാഖിലെ മുഴുവന് ജനങ്ങളെയും ബോധ്യപ്പെടുത്താനാണ് ചിത്രം പുറത്തുവിട്ടതെന്ന് പറയുന്നു.
വെടിയുണ്ടയേറ്റ പാടുകളും രക്തക്കറകളും പുരണ്ട ഫോട്ടോകള് സദ്ദാം വിശ്വസ്തരെ ഞെട്ടിച്ചിട്ടുണ്ട്. സദ്ദാമിനെ പിടികൂടുന്നതിന് യുഎസ് സേനയെ സഹായിക്കാന് ഇറാഖികള്ക്ക് മനോവീര്യം നല്കുന്നതിന് കൂടിയാണ് സദ്ദാമിന്റെ മക്കളുടെ ചിത്രങ്ങള് പുറത്തുവിടാന് യുഎസ് അധികൃതരെ പ്രേരിപ്പിച്ചതെന്ന് കരുതുന്നു.
ഈയിടെ യുഎസ് സേനയ്ക്ക് നേരെ സദ്ദാം വിശ്വസ്തര് നടത്തിയ കൂടെക്കൂടെയുള്ള ആക്രമണങ്ങളില് 80ഓളം യുഎസ് സൈനികര് കൊല്ലപ്പെട്ടിരുന്നു. ഇതിന് പ്രതികാരമെന്ന നിലയ്ക്ക് കൂടിയാണ് ഖുസെയെയും ഉദയിനെയും യുഎസ് സേന വെടിവച്ച് കൊന്നത്. വടക്കന് ഇറാഖിലെ മൊസൂലില് വെടിയേറ്റ് മരിച്ച ഇരുവരുടെയും മൃതദേഹങ്ങള് കഴിഞ്ഞ ദിവസം ബാഗ്ദാദില് കൊണ്ടുവന്നിരുന്നു. മരിച്ചത് സദ്ദാമിന്റെ മക്കള് തന്നെയാണെന്ന് ഇറാഖി ഭരണകൗണ്സിലിലെ ഡോക്ടര് മുഫാവക് അല് റുബായ് സ്ഥിരീകരിച്ചു.