തിരുവനന്തപുരം നഗരത്തില് യാചകരെ നിരോധിച്ചു
തിരുവനന്തപുരം: തിരുവനന്തപുരം നഗരത്തില് യാചന നിരോധിച്ചു. തലസ്ഥാന നഗരം മോടി പിടിപ്പിയ്ക്കുന്നതിന്റെ ഭാഗമായാണ് ഇത്. ഇനി മുതല് നഗര പരിധിയ്ക്കുള്ളില് യാചകരെ അനുവദിയ്ക്കുന്നതല്ല. സര്ക്കാര് പത്രക്കുറിപ്പിലാണ് ഇത് അറിയിച്ചത്.
തിരുവനന്തപുരം കോര്പ്പറേഷന് മേയറുടെ നിര്ദ്ദേശപ്രകാരമാണ് സര്ക്കാര് ഈ ഉത്തരവ് പുറപ്പെടുവിച്ചത്. നഗരത്തില് യാചകരുടെ എണ്ണം കൂടി വരുന്നതുകൊണ്ടാണ് മേയര് ഇത് ആവശ്യപ്പെട്ടത്.
അയല് സംസ്ഥാനമായ തമിഴ്നാട്ടില് നിന്നാണ് ഏറെ യാചകരും തിരുവനന്തപുരത്ത് എത്തുന്നത്. യാചകരെ കൂട്ടമായി തിരുവനന്തപുരത്ത് എത്തിയ്ക്കുന്ന ഏജന്റുമാര് പോലും നഗരത്തില് പ്രവര്ത്തിയ്ക്കുന്നതായി കോര്പ്പറേഷന്റെ ശ്രദ്ധയില് പെട്ടിട്ടുണ്ട്. ഏജന്റുമാര് എല്ലാ ദിവസവും വൈകുന്നേരം യാചകരില് നിന്ന് അന്ന് പിരിഞ്ഞുകിട്ടിയ തുകയുടെ ഏറിയ പങ്കും കൈക്കലാക്കും. ഇതിന് സഹകരിച്ചില്ലെങ്കില് മര്ദ്ദിയ്ക്കുകയും ചെയ്യും. തിരുവനന്തുപരത്തിന്റെ അയല് ജില്ലയായ തമിഴ്നാട്ടിലെ കന്യാകുമാരിയില് നിന്നും കൊല്ലത്തിന്റെ അയല് ജില്ലയായ തമിഴ്നാട്ടിലെ ചെങ്കോട്ടയില് നിന്നുമാണ് തിരുവനന്തപുരം ജില്ലയിലേയ്ക്ക് തമിഴ് യാചകര് പ്രധാനമായും എത്തുന്നത്. ഈ ജില്ലകളില് നിന്ന് കേരളത്തില് എത്തുന്ന തീവണ്ടികളിലാണ് സംഘമായി യാചകര് വരുന്നത്.