പൂയംകുട്ടി കൈയേറ്റം: റിപ്പോര്‍ട്ട് സമര്‍പ്പിച്ചു

തിരുവനന്തപുരം: പൂയംകുട്ടിയിലെ വനംകൈയേറ്റത്തെ കുറിച്ചുള്ള അന്വേഷണ റിപ്പോര്‍ട്ട് സമര്‍പ്പിച്ചു. പൂയംകുട്ടിയില്‍ വനംകേൈറ്റം നടന്നിട്ടുണ്ടെന്നും ഇത് വനം, റവന്യു വകുപ്പുകളുടെ അറിവോടെയും സഹകണത്തോടെയുമാണെന്നാണ് റിപ്പോര്‍ട്ടില്‍ പറയുന്നത്.

പൂയംകുട്ടിയില്‍ വന്‍തോതില്‍ ഭൂമി കൈയേറ്റം നടക്കുന്നുണ്ടെന്ന ആരോപണത്തെ തുടര്‍ന്ന് ഫോറസ്റ് കണ്‍സര്‍വേറ്റര്‍ വി. ഗോപിനാഥനെയാണ് സര്‍ക്കാര്‍ അന്വേഷണത്തിന് നിയോഗിച്ചത്. റിപ്പോര്‍ട്ട് വനസംരക്ഷണവിഭാഗം ചീഫ് കണ്‍സര്‍േവറ്റര്‍ വി. എസ്. വര്‍ഗീസിന് സമര്‍പ്പിച്ചു.

പൂയംകുട്ടി വനത്തിന്റെ 28 ഭാഗങ്ങളിലായി ആയിരക്കണക്കിന് ഏക്കര്‍ ഭൂമി കൈയേറിയിട്ടുണ്ടെന്നാണ് അന്വേഷണത്തിലെ കണ്ടെത്തല്‍. കൈയേറിയ വനഭൂമിക്ക് റവന്യു ഉദ്യോഗസ്ഥര്‍ അനധികൃത പട്ടയം നല്‍കിയിട്ടുണ്ട്. ആദിവാസികളെ മുന്‍നിര്‍ത്തിയാണ് ചില സ്വകാര്യവ്യക്തികള്‍ ഭൂമി കൈയേറിയത്. കൈയേറ്റം തടയാന്‍ വനം വകുപ്പിന്റെ ഭാഗത്തു നിന്ന് ഫലപ്രദമായ നടപടികളുണ്ടായില്ലെന്ന് റിപ്പോര്‍ട്ടില്‍ കുറ്റപ്പെടുത്തുന്നു.

2002 മെയില്‍ പ്രതിപക്ഷ നേതാവ് വി. എസ്. അച്യുതാനന്ദനാണ് പൂയംകുട്ടിയില്‍ വനംകൈയേറ്റം നടക്കുന്നുവെന്ന് ആരോപിച്ചത്. തുടര്‍ന്ന് വനംവകുപ്പ് അന്വേഷണത്തിന് ഉത്തരവിടുകയായിരുന്നു.