രാമക്ഷേത്രം പണിയുമെന്ന് വാജ്പേയി

അയോദ്ധ്യ: അയോദ്ധ്യയില്‍ രാമക്ഷേത്രം പണിയുമെന്ന് പ്രധാനമന്ത്രി വാജ്പേയിയും ഉപ പ്രധാനമന്ത്രി ലാല്‍ കൃഷ്ണ അദ്വാനിയും വ്യക്തമാക്കി. ഇതിന് വിഘാതമായി നില്‍ക്കുന്ന പ്രശ്നങ്ങള്‍ നീക്കാന്‍ കഴിയുമെന്ന് ഇരുവരും പ്രത്യാശ പ്രകടിപ്പിച്ചു.

രാമചന്ദ്ര പരമഹംസിന്റെ ശവസംസ്കാര ചടങ്ങില്‍ സംസാരിയ്ക്കവേയായിരുന്നു ഇരുവരും ഈ അഭിപ്രായം പ്രകടിപ്പിച്ചത്. പരമഹംസിന്റെ എക്കാലത്തേയും ആഗ്രഹം ഞങ്ങള്‍ നടത്തുക തന്നെ ചെയ്യും. അദ്വാനി പറഞ്ഞു.

പല ആളുകള്‍ക്കും ഇതില്‍ എതിര്‍പ്പുണ്ടാവും. പക്ഷേ ആ എതിര്‍പ്പുകളൊക്കെ വഴയേ മാറും. അവരുടെ സഹകരണത്തോടെ തന്നെ അയോദ്ധ്യയില്‍ രാമക്ഷേത്രം പണിയും. രാം ജന്മ ഭൂമി ന്യാസ് പ്രസിഡണ്ട് രാമചന്ദ്ര പരമഹംസിന്റെ ചിതയ്ക്ക് മുന്നില്‍ നില്‍ക്കുമ്പോള്‍ ഇക്കാര്യത്തില്‍ കൂടുതല്‍ ആത്മ വിശ്വാസം തോന്നുകയാണ്. വാജ് പേയി പറഞ്ഞു.