മാറാട്: സിബിഐ അന്വേഷണം വേണ്ടെന്ന്

കൊച്ചി: മാറാട് പ്രശ്നത്തില്‍ സിബിഐ അന്വേഷണം വേണമെന്നാവശ്യപ്പെട്ട് ഹൈക്കോടതിയില്‍ നല്കിയിരുന്ന ഹര്‍ജികര്‍ അപേക്ഷകര്‍ പിന്‍വലിച്ചു. ക്രൈംബ്രാഞ്ച് ഐജി മഹേഷ്കുമാര്‍ സിംഗ്ല നല്കിയ വിശദീകരണം തൃപ്തികരമായതിനെ തുടര്‍ന്നാണ് മൂന്ന് ഹര്‍ജിക്കാരും സിബിഐ അന്വേഷണത്തിനുള്ള ഹര്‍ജികള്‍ പിന്‍വലിച്ചത്.

അതിനാല്‍ ഇക്കാര്യത്തില്‍ ഹൈക്കോടതിയ്ക്ക് തീരുമാനമെടുക്കേണ്ടിവന്നില്ല. അന്വേഷണത്തിന് നേതൃത്വം നല്കുന്ന ക്രൈംബ്രാഞ്ച് ഐജി മഹേഷ്കുമാര്‍ സിംഗ്ല കോടതിയില്‍ നേരിട്ട് ഹാജരായി വിശദീകരണം നല്കി.

ഹൈക്കോടതി ചീഫ് ജസ്റിസ് ജെ.എല്‍. ഗുപ്തയുടെ ചോദ്യങ്ങള്‍ക്ക് ഐജി വിശദമായി മറുപടി നല്കി. മാറാട് കേസിലെ പ്രതികള്‍ക്ക് ഹവാല ഇടപാടുമായോ അന്തര്‍സംസ്ഥാന തീവ്രവാദികളുമായോ ബന്ധമില്ലെന്ന് അദ്ദേഹം പറഞ്ഞു. മാറാട് കേസിലെ പ്രതികളായ കോയമോന്‍, ലത്തീഫ് എന്നിവര്‍ കോയമ്പത്തൂര്‍ സ്ഫോടനപരമ്പരക്കേസില്‍ പ്രതികളാണെന്ന് ഹര്‍ജിക്കാരിലൊരാളായ ഗോകുല്‍ദാസ് ആരോപിച്ചിരുന്നു. എന്നാല്‍ ഈ ആരോപണം ശരിയല്ലെന്ന് ഐജി തീര്‍ത്തുപറഞ്ഞു.

ആരുടെയും ഇടപെടല്‍ കേസന്വേഷണത്തിലുണ്ടായിട്ടില്ലെന്നും ഇക്കാര്യത്തില്‍ ആഭ്യന്തരവകുപ്പിന്റെ ചുമതലയുള്ള മുഖ്യമന്ത്രി തനിയ്ക്ക് പൂര്‍ണ്ണ സ്വാതന്ത്യ്രം നല്കിയിട്ടുണ്ടെന്നും ഐജി കോടതിയില്‍ വിശദീകരിച്ചു. ഐജിയുടെ ഉത്തരങ്ങള്‍ സ്വാഭാവികമായിട്ടുള്ളതാണെന്നും കൃത്രിമമായിട്ടുള്ളതാണെന്ന് തോന്നുന്നില്ലെന്നും ഹൈക്കോടതി ചീഫ്ജസ്റിസ് അഭിപ്രായപ്പെട്ടു.

തുടര്‍ന്ന് സിബിഐ അന്വേഷണം വേണമെന്ന് ആവശ്യപ്പെട്ടുകൊണ്ടുള്ള ഹര്‍ജികള്‍ പിന്‍വലിയ്ക്കുകയാണെന്ന് ഹര്‍ജിക്കാരുടെ അഭിഭാഷകന്‍ തോട്ടത്തില്‍ രാധാകൃഷ്ണന്‍ അറിയിച്ചു.