മാറാട്: കോടതി ജില്ലാ ജയിലില്‍ സ്ഥാപിക്കില്ല

കോഴിക്കോട്: മാറാട് കൂട്ടക്കൊലയുമായി ബന്ധപ്പെട്ട കേസുകള്‍ വിചാരണ ചെയ്യുന്ന പ്രത്യേക കോടതികള്‍ ജില്ലാ ജയിലില്‍ സ്ഥാപിക്കില്ല. ജില്ലാ ജയിലില്‍ രണ്ട് കോടതികള്‍ സ്ഥാപിക്കാനുള്ള സൗകര്യമില്ലാത്തതിനാലാണ് ഈ നീക്കം ഉപേക്ഷിച്ചത്.

കോടതി സ്ഥാപിക്കുന്നതിന് സൗകര്യമുണ്ടോയെന്ന് എരഞ്ഞിപ്പാലത്തെ പൂട്ടിയിട്ട ജി എല്‍ പി സ്കൂളില്‍ പരിശോധന നടത്തും.

ഒരു പ്രത്യേക അഡീഷണല്‍ സെഷന്‍സ് കോടതിയും പ്രത്യേക ജുഡീഷ്യല്‍ ഫസ്റ് ക്ലാസ് മജിസ്ട്രേറ്റ് കോടതിയും സ്ഥാപിക്കുന്നതിനായി നേരത്തെ ചില സ്ഥലങ്ങള്‍ പരിശോധിച്ചിരുന്നു. എന്നാല്‍ ഇവിടങ്ങളില്‍ കോടതി സ്ഥാപിക്കാനാവില്ലെന്ന് വ്യക്തമായി.

തുറന്ന കോടതിയിലാണ് കേസുകളിന്മേലുള്ള വിചാരണ നടത്തുന്നതെന്നതിനാല്‍ പ്രത്യേക കോടതി ജില്ലാ ജയിലില്‍ സ്ഥാപിക്കാന്‍ ബുദ്ധിമുട്ടുകളുണ്ട്. ജയിലിലെ സുരക്ഷാ ക്രമീകരണങ്ങള്‍ കണക്കിലെടുക്കുമ്പോള്‍ തുറന്ന കോടതി അതിനകത്ത് പ്രവര്‍ത്തിക്കുന്നത് അസൗകര്യമുണ്ടാക്കും.