കോളവളത്തില്‍ വിഷമുണ്ടെന്ന് ബോര്‍ഡ്

തിരുവനന്തപുരം: പ്ലാച്ചിമടയിലെ കൊക്ക കോള ഫാക്ടറിയിലെ മാലിന്യത്തില്‍ അപകടകരമായ തോതില്‍ വിഷാംശം കലര്‍ന്നിട്ടുണ്ടെന്ന് മലിനീകരണ നിയന്ത്രണ ബോര്‍ഡ് അറിയിച്ചു.

മലിനീകരണ നിയന്ത്രണ ബോര്‍ഡ് ചെയര്‍മാന്‍ പോള്‍ തച്ചില്‍ ആഗസ്ത് ആറ് ബുധനാഴ്ച വാര്‍ത്താ സമ്മേളനത്തിലാണ് ഇക്കാര്യം അറിയിച്ചത്.

കൊക്ക കോള ഫാക്ടറിയിലെ മാലിന്യത്തില്‍ കാഡ്മിയത്തിന്റെയും ലെഡിന്റെയും അംശം വളരെ കൂടുതലാണ്. കാഡ്മിയത്തിന്റെ അംശം 201.8 ശതമാനവും ലെഡിന്റെ അംശം 319 ശതമാനവുമാണ് കണ്ടെത്തിയത്.

ഈ മാലിന്യങ്ങള്‍ ഫാക്ടറിയിലും പുറത്തും വളമായി ഉപയോഗിക്കരുതെന്ന് നിര്‍ദേശം നല്‍കിയിട്ടുണ്ട്. ഇതുസംബന്ധിച്ച വിശദപഠനം ബോര്‍ഡ് നടത്തും.

മാലിന്യത്തില്‍ വിഷാംശമുണ്ടെന്ന് കണ്ടെത്തിയ സാഹചര്യത്തില്‍ കൊക്ക കോള ഉത്പന്നങ്ങളും പരിശോധിക്കേണ്ടതാണ്. എന്നാല്‍ ഇത് ബോര്‍ഡിന്റെ പരിധിയില്‍ പെടുന്നതല്ല. ആരോഗ്യവകുപ്പും ഫുഡ് കണ്‍ട്രോളറുമാണ് ഇതുസംബന്ധിച്ച പരിശോധന നടത്തേണ്ടത്.

കഴിഞ്ഞ കുറച്ച് മാസങ്ങള്‍ കൊണ്ട് എങ്ങനെ ഈ വിഷാശംങ്ങള്‍ ഇത്രയും അധികം കൂടി എന്നും പരിശോധിയ്ക്കേണ്ടതുണ്ടെന്നും പോള്‍ തച്ചില്‍ പറഞ്ഞു.

പരിശോധനയ്ക്കായി കമ്പനിയുടെ പരിസരത്ത് നിന്ന് വീണ്ടും വെള്ളം എടുത്തിട്ടുണ്ട്.