മാറാട്: ബിജെപിയുമായി ചര്‍ച്ച വേണം

കോഴിക്കോട്: മാറാട് പുനരധിവാസ പ്രവര്‍ത്തനം ഫലപ്രദമായി വീണ്ടും തുടങ്ങുന്നതിന് ബി ജെ പി, ആര്‍ എസ് എസ്, വി എച്ച് പി നേതാക്കളുമായി ഉന്നതതല ചര്‍ച്ച നടത്തുന്നത് സഹായകമാവുമെന്ന് ജില്ലാ കളക്ടര്‍ മന്ത്രിസഭാ ഉപസമിതിയോട് ശുപാര്‍ശ ചെയ്തു.

പുനരധിവാസം സംബന്ധിച്ച് ഒരു തീരുമാനമെടുക്കുന്നതിന് മുമ്പ് ആര്‍ എസ് എസ്, വി എച്ച് പി, ബി ജെ പി നേതാക്കളുമായി ചര്‍ച്ച നടത്തേണ്ടത് അവശ്യമാണെന്ന് മന്ത്രിസഭാ ഉപസമിതിയെ അറിയിച്ചിട്ടുണ്ടെന്ന് കളക്ടര്‍ ടി. ഒ. സൂരജ് പറഞ്ഞു.

പുനരധിവാസ പ്രവര്‍ത്തനം മാറാട്ടെ ചുള്ളിയന്‍വളപ്പില്‍ തുടങ്ങും. കലാപത്തെ തുടര്‍ന്ന് പലായനം ചെയ്ത 45 കുടുംബങ്ങളെ പുനരധിവസിപ്പിക്കും. പുനരധിനാസ പ്രവര്‍ത്തനത്തിന് വിജയകമായ തുടക്കമിട്ടാല്‍ മറ്റ് കുടുംബങ്ങള്‍ സ്വാഭാവികമായും മാറാട്ടേക്ക് വന്നുതുടങ്ങും.

മാറാട് കേസിലെ പ്രതികളുടെ അടുത്ത ബന്ധുക്കളെ പുനരധിവസിപ്പിക്കുന്നതിനോട് മാത്രമേ തങ്ങള്‍ക്ക് എതിര്‍പ്പുള്ളൂവെന്ന് അരയസമാജം നേതാക്കള്‍ അറിയിച്ചിട്ടുണ്ട്. പുനരധിവാസത്തെ തങ്ങള്‍ എതിര്‍ക്കില്ലെന്നും അവര്‍ വ്യക്തമാക്കിയിട്ടുണ്ട്- കളക്ടര്‍ പറഞ്ഞു.