ഇദി അമീന്‍ അന്തരിച്ചു

ജിദ്ദ: ഉഗാണ്ടയിലെ മുന്‍ ഏകാധിപതി ഇദി അമീന്‍ (80) അന്തരിച്ചു. ജൂലൈ 18 മുതല്‍ ആരോഗ്യസ്ഥിതി തീരെ വഷളായ നിലയില്‍ സൗദി അറേബ്യയുടെ തലസ്ഥാനമായ ജിദ്ദയിലെ ഒരു ആശുപത്രിയില്‍ കഴിയുകയായിരുന്നു ഇദി അമീന്‍.

എട്ട് വര്‍ഷക്കാലം ഉഗാണ്ടയുടെ ഏകാധിപതിയായി വാണ ഇദി അമീന്‍ കൊലപാതക വാസനക്കും ദുഷ്ചെയ്തികള്‍ക്കും കുപ്രസിദ്ധനായിരുന്നു.

ഉയര്‍ന്ന രക്തസമ്മര്‍ദത്തെ തുടര്‍ന്ന് ആശുപത്രിയില്‍ പ്രവേശിക്കുമ്പോള്‍ ഇദി അമീന്‍ ബോധമില്ലാത്ത സ്ഥിതിയിലായിരുന്നു. പിന്നീട് വൃക്കകളും തകരാറിലായി.

1979ല്‍ അധികാരത്തില്‍ നിന്നും പുറത്താക്കപ്പെട്ട ഇദി അമീന്‍ ഉഗാണ്ടയില്‍ നിന്ന് ലിബിയയിലേക്ക് ഒളിച്ചോടുകയായിരുന്നു. പിന്നീട് ഇറാക്കിലെത്തി. സൗദി അറേബ്യയില്‍ താമസിക്കാന്‍ സൗദി സര്‍ക്കാര്‍ അനുവദിച്ചതിനെ തുടര്‍ന്ന് അവിടെ കഴിയുകയായിരുന്നു അദ്ദേഹം.

1971 ജനവരി 25നാണ് ഹെവി വെയ്റ്റ് ബോക്സിംഗ് ചാമ്പ്യനും ബ്രിട്ടീഷ് ആര്‍മിയില്‍ സൈനികനുമായിരുന്ന ഇദി അമീന്‍ ഉഗാണ്ടയുടെ അധികാരം പിടിച്ചെടുക്കുന്നത്. പ്രസിഡന്റായിരുന്ന മില്‍ടണ്‍ ഒബോട്ടെയെ അധികാരത്തില്‍ നിന്ന് പുറത്താക്കിയാണ് ഇദി അമീന്‍ ഏകാധിപതിയായത്.

1971 മുതല്‍ 1979 വരെയുള്ള ഇദി അമീന്റെ ആധിപത്യകാലത്ത് ഉഗാണ്ടയിലെ അഞ്ച് ലക്ഷത്തോളം പേര്‍ കൊല ചെയ്യപ്പെട്ടെന്നാണ് മനുഷ്യാവകാശ സംഘടനകള്‍ പറയുന്നത്.