കൊക്ക കോളയില് കീടനാശിനിയില്ലെന്ന് ആരോഗ്യവകുപ്പ്
തിരുവനന്തപുരം: കൊക്ക കോളയില് കീടനാശിനിയില്ലെന്ന് പരിശോധനയില് തെളിഞ്ഞതായി ആരോഗ്യവകുപ്പ് ഡയറക്ടര് ഡോ. പി. കെ. രാജന് വാര്ത്താ കുറിപ്പില് അറിയിച്ചു.
ആരോഗ്യവകുപ്പ് നടത്തിയ കൊക്ക കോള പാനീയത്തിന്റെ പരിശോധനയില് കാഡ്മിയം കണ്ടെത്തിയിട്ടില്ല. ലെഡിന്റെ അംശം അനുവദനീയമായ തോതിലും താഴെയാണ്. കീടനാശിനികളായ ബി എച്ച് സി, ഡി ഡി ടി, മാലത്തിയോണ്, പാരതിയോണ്, കാര്ബോഫുറാന് എന്നിവയുടെ അംശവും കൊക്ക കോളയിലില്ല.
തിരുവനന്തപുരത്തെ സര്ക്കാര് അനലിറ്റിക്കല് ലബോട്ടറിയില് നടത്തിയ പരിശോധനയുടെ ഫലത്തിലാണ് ഇക്കാര്യം വ്യക്തമായത്. സംസ്ഥാനത്തിന്റെ വിവിധ ഭാഗങ്ങളില് നിന്ന് മൂന്ന് ഫുഡ് ഇന്സ്പെക്ടര്മാര് ശേഖരിച്ച സാമ്പിളുകളാണ് പരിശോധിച്ചത്.
ആധുനിക ഉപകരണങ്ങളായ ഹൈ പെര്ഫോമന്സ് ലിക്വിഡ് ക്രോമറ്റോഗ്രാഫ്, അറ്റോമിക് അപ്സോര്ബ്ഷന് സ്പെക്ട്രോ ഫോട്ടോ മീറ്റര് എന്നിവ ഉപയോഗിച്ചാണ് പരിശോധന നടത്തിയത്.
പരിശോധനയുടെ മറ്റ് വിശദാംശങ്ങളൊന്നും വാര്ത്താ കുറിപ്പില് വ്യക്തമാക്കിയിട്ടില്ല. ഏത് രീതിയാണ് പരിശോധനക്ക് അവലംബിച്ചതെന്നും പറയുന്നില്ല.
Click it and Unblock the Notifications
Sign in with Google