കൊക്ക കോളക്ക് വേണ്ടി തൊഴിലാളികള്‍

പാലക്കാട്: കൊക്ക കോളക്കെതിരായ പ്രചാരണം രാഷ്ട്രീയപാര്‍ട്ടികളും മറ്റ് സംഘടനകളും നിര്‍ത്തണമെന്ന് കൊക്ക കോള തൊഴിലാളി സംരക്ഷണ സമിതി ആവശ്യപ്പെട്ടു.

കൊക്ക കോളക്കെതിരായ പ്രചാരണം 500 കുടുംബങ്ങളുടെ ജീവിതമാര്‍ഗത്തെയാണ് ബാധിക്കുന്നതെന്ന് സമിതി നേതാക്കള്‍ വാര്‍ത്താ സമ്മേളനത്തില്‍ പറഞ്ഞു.

പ്ലാച്ചിമടയില്‍ കമ്പനി മലിനീകരണ പ്രശ്നമുണ്ടാക്കുന്നില്ല. ആരോപിക്കപ്പെട്ടതു പോലെ കൊക്ക കോള ഫാക്ടറിയില്‍ നിന്ന് കര്‍ഷകര്‍ക്ക് നല്‍കിയ മാലിന്യം അപകടമുണ്ടാക്കുന്നതല്ല. കഴിഞ്ഞ മൂന്ന് കൊല്ലമായി മാലിന്യങ്ങള്‍ കൈകാര്യം ചെയ്തുവരുന്ന തൊഴിലാളികള്‍ക്ക് ത്വക്രോഗമോ മറ്റ് പ്രശ്നങ്ങളോ ഉണ്ടായിട്ടില്ല.

കമ്പനിക്കടുത്ത് താമസിക്കുന്ന പതിനഞ്ച് കുടുംബങ്ങള്‍ മാത്രമാണ് ഫാക്ടറിക്കെതിരെ സമരം ചെയ്യുന്നത്. ഇപ്പോള്‍ അത് പുറത്തുള്ള സംഘടനകള്‍ ഏറ്റെടുത്തിരിക്കുന്നു. കൊക്ക കോള ഫാക്ടറി അമിതമായി വെള്ളമൂറ്റുന്നുവെന്ന ആരോപണം ശരിയല്ല. മലിനീകരണ നിയന്ത്രണത്തിനും ഫാക്ടറിയില്‍ ഫലപ്രദമായ സംവിധാനമുണ്ട്.

ബി ബി സി റിപ്പോര്‍ട്ടര്‍ മാലിന്യം ശേഖരിച്ചത് ഫാക്ടറി വളപ്പില്‍ നിന്നല്ല, പുറത്തുനിന്നാണ്. വളമെന്ന നിലയിലല്ല മണ്ണ് വൃത്തിയാക്കുന്ന വസ്തുവെന്ന നിലയിലാണ് മാലിന്യം കര്‍ഷകര്‍ക്ക് വിതരണം ചെയ്തത്- സമിതി നേതാക്കള്‍ പറഞ്ഞു.