ത്രിതല ഫീസ് സമ്പ്രദായം പരിഗണിക്കുന്നു
തിരുവനന്തപുരം: സ്വാശ്രയ പ്രൊഫഷണല് കോളജുകളില് ത്രിതല ഫീസ് സമ്പ്രദായം ഏര്പ്പെടുത്തുന്നതു സംബന്ധിച്ച് മന്ത്രിസഭാ ഉപസമിതി ആഗസ്ത് 18 തിങ്കളാഴ്ച ചര്ച്ച ചെയ്തു.
ചര്ച്ച ചൊവാഴ്ചയും തുടരും. സ്വാശ്രയ പ്രൊഫഷണല് കോളജുകളിലെ ഫീസും പ്രവേശനവും സംബന്ധിച്ച് ചൊവാഴ്ചത്തെ ചര്ച്ചയില് തീരുമാനമുണ്ടായേക്കും. ബുധനാഴ്ച ചേരുന്ന മന്ത്രിസഭാ യോഗമാണ് ഇതുസംബന്ധിച്ച് അന്തിമതീരുമാനം കൈകൊള്ളേണ്ടത്.
ത്രിതല ഫീസ് സമ്പ്രദായം നടപ്പിലാക്കാനുള്ള നിര്ദേശത്തില് വരുമാനത്തിന്റെ അടിസ്ഥാനത്തില് ഫീസ് നിശ്ചയിക്കാനാണ് പറയുന്നത്. ഇത് അനുസരിച്ച് സ്വാശ്രയ പ്രൊഫണല് കോളജുകളില് മൂന്ന് ലക്ഷത്തിലേറെ വാര്ഷിക വരുമാനമുള്ളവരുടെ മക്കളില് നിന്ന് ഇപ്പോള് നിശ്ചയിച്ചിരിക്കുന്ന ഫീസായ 1.76 ലക്ഷത്തിന്റെ 75 ശതമാനം ഈടാക്കണം. 1.50 ലക്ഷത്തിനും മൂന്ന് ലക്ഷത്തിനും ഇടയില് വരുമാനമുള്ളവരുടെ മക്കളില് നിന്നും ഇപ്പോഴത്തെ ഫീസിന്റെ 50 ശതമാനവും 1.50 ലക്ഷത്തില് താഴെ വരുമാനമുള്ളവരുടെ മക്കളില് നിന്നും ഇപ്പോഴത്തെ ഫീസിന്റെ 25 ശതമാനവും ഈടാക്കാനാണ് നിര്ദേശം.
എന്നാല് ഒരു സ്ഥാപനത്തില് ഒരേ കോഴ്സിന് വ്യത്യസ്ത ഫീസുകള് ഈടാക്കാന് പാടില്ലെന്ന് സുപ്രിം കോടതി വിധിയില് പറയുന്നുണ്ട്. ഇതിന്റെ പശ്ചാത്തലത്തില് ത്രിതല ഫീസ് സമ്പ്രദായം പ്രായോഗികമാവുന്നതിന് തടസങ്ങളുണ്ട്. സര്ക്കാര് കോളജുകളില് ഈടാക്കുന്ന ഫീസ് മാത്രമേ സ്വാശ്രയ കോളജുകളിലെ മെറിറ്റ് സീറ്റിലും ഈടാക്കൂവെന്ന് സ്വാശ്രയ കോളജ് പ്രശ്നത്തില് സമരം നടത്തിയ വിദ്യാര്ഥികള്ക്ക് സര്ക്കാര് ഉറപ്പ് നല്കിയിരുന്നതുമാണ്.