എച്ച്ഡിഎഫ്സി-എസ്കോട്ടെല് ഡെബിറ്റ്കാര്ഡ്
കൊച്ചി: എച്ച് ഡി എഫ് സി ബാങ്കും എസ്കോട്ടെല്ലും ചേര്ന്നുള്ള ഇന്റര്നാഷണല് ഡെബിറ്റ് കാര്ഡ് പുറത്തിറക്കി. രാജ്യത്തില് ഇത്തരത്തിലുള്ള ആദ്യത്തെ ഡെബിറ്റ് കാര്ഡാണിതെന്നാണ് എച്ച് ഡി എഫ് സിയുടെയും എസ്കോട്ടെല്ലിന്റെയും അവകാശവാദം.
ഡെബിറ്റ് കാര്ഡ് സ്വന്തമാക്കുന്ന ഉപഭോക്താക്കള്ക്ക് എച്ച് ഡി എഫ് സിയില് നിന്നും എസ്കോട്ടെല്ലില് നിന്നും ധാരാളം ആനുകൂല്യങ്ങള് ലഭിക്കുമെന്ന് എച്ച് ഡി എഫ് സി ബാങ്ക് റീട്ടയില് ബാങ്കിംഗ് തലവന് നീരജ് സ്വരൂപ് പറഞ്ഞു.
എസ്കോട്ടെല് ഉപഭോക്താക്കള്ക്ക് ഡെബിറ്റ് കാര്ഡ് നല്കുന്നത് സൗജന്യമായി തന്നെയാണ്. കാര്ഡിനായി നല്കുന്ന 150 രൂപക്ക് തുല്യമായ ടോക്ക് ടൈം ഉപഭോക്താക്കള്ക്ക് ലഭിക്കും. രണ്ട് ലക്ഷം രൂപയുടെ പേഴ്സണല് ആക്സിഡന്റ് ഇന്ഷ്വറന്സും എച്ച് ഡി എഫ് സി യില് നിന്ന് പേഴ്സണല് ലോണെടുക്കുമ്പോള് പ്രോസസിംഗ് ഫീയില് ഒരു ശതമാനം കുറവും ലഭിക്കും.
പുതിയ പോസ്റ് പെയിഡ് ഉപഭോക്താക്കള്ക്ക് മൊബൈല് ആക്ടിവേഷന് ഫീസായ 532 രൂപയും റോമിംഗിനുള്ള വാടകയായി വര്ഷത്തില് നല്കേണ്ട 1200 രൂപയും നല്കേണ്ടതില്ല. പ്രി പെയിഡ് ഉപഭോക്താക്കള്ക്ക് ആദ്യത്തെ അഞ്ച് റീചാര്ജിംഗുകളില് 50 രൂപയുടെ ടോക് ടൈം സൗജന്യമായി ലഭിക്കും.
കേരളത്തിലെ പ്രതികരണം നിരീക്ഷിച്ച ശേഷം എസ്കോട്ടെല് ഉത്തര്പ്രദേശിലും ഉത്തരാഞ്ചലിലും ഹരിയാനയിലും ഡെബിറ്റ് കാര്ഡിറക്കും.