കോണ്‍-സിപിഎം സഖ്യം കേരളത്തില്‍ പരീക്ഷിയ്ക്കൂ- ബിജെപി

കോഴിക്കോട്: ദേശീയതലത്തില്‍ രൂപപ്പെടുന്ന കോണ്‍ഗ്രസിന്റെയും സിപിഎമ്മിന്റെയും സഖ്യത്തിന്റെ ആദ്യപരീക്ഷണമാണ് എറണാകുളം ലോക്സഭാ തിരഞ്ഞെടുപ്പെന്ന് ബി ജെ പി സംസ്ഥാന പ്രസിഡന്റ് പി. എസ്. ശ്രീധരന്‍പിള്ള വാര്‍ത്താ സമ്മേളനത്തില്‍ പറഞ്ഞു.

ദേശീയതലത്തില്‍ ഒന്നിക്കുന്നതിന് കോണ്‍ഗ്രസും സി പി എമ്മും താത്പര്യം പ്രകടിപ്പിച്ചിട്ടുണ്ട്. എറണാകുളം ഉപതിരഞ്ഞെടുപ്പ് ഈ സഖ്യത്തിന്റെ ആദ്യത്തെ പരീക്ഷണമാവാം. കേരളത്തില്‍ ഈ വെല്ലുവിളിയെ നേരിടാന്‍ ബി ജെ പി ഒരുക്കമാണ്.

ചില സംസ്ഥാനങ്ങളില്‍ പരസ്പരം കലഹിച്ചും ദേശീയതലത്തില്‍ സഖ്യം രൂപീകരിക്കുമെന്ന് പറഞ്ഞും കോണ്‍ഗ്രസും സി പി എമ്മും ജനങ്ങളെ ആശയക്കുഴപ്പത്തിലാക്കുകയാണ്.

മാറാട് പ്രശ്നത്തില്‍ മുസ്ലിം സംഘടനകള്‍ സി ബി ഐ അന്വേഷണത്തോട് യോജിപ്പ് പ്രകടിപ്പിച്ചിട്ടുണ്ട്. ഇനി ഇക്കാര്യത്തില്‍ തീരുമാനമെടുക്കേണ്ടത് മുഖ്യമന്ത്രിയും പാണക്കാട് ശിഹാബ് തങ്ങളും ചേര്‍ന്നാണ്. ശ്രീധരന്‍ പിള്ള പറഞ്ഞു.