സ്വാശ്രയ ഫീസ്: ഉപസമിതിയെ നിയോഗിച്ചു

തിരുവനന്തപുരം: സ്വാശ്രയ പ്രൊഫഷണല്‍ കോളജുകളിലെ ഫീസ് സംബന്ധിച്ച് തീരുമാനമെടുക്കാന്‍ നാലംഗ മന്ത്രിസഭാ ഉപസമിതിയെ നിയോഗിച്ചു.

ആഗസ്ത് 20 ബുധനാഴ്ച മന്ത്രിസഭായോഗത്തിന് ശേഷം വാര്‍ത്താ സമ്മേളനത്തില്‍ മുഖ്യമന്ത്രി എ. കെ. ആന്റണിയാണ് ഇക്കാര്യം അറിയിച്ചത്. സുപ്രിം കോടതി വിധിയില്‍ പറയുന്നതു പോലെ സ്വാശ്രയ കോളജുകളിലെ മാനേജ്മെന്റ് ക്വാട്ടയിലും മെറിറ്റ് ക്വാട്ടയിലും അമ്പത് ശതമാനം വീതം സീറ്റുകളില്‍ പ്രവേശനം നടത്തും. സപ്തംബര്‍ 30ന് മുമ്പ് പ്രൊഫഷണല്‍ കോളജുകളിലെ പ്രവേശം പൂര്‍ത്തിയാക്കുമെന്നും അനിശ്ചിതത്വത്തിന് ഇടവരുത്തില്ലെന്നും അദ്ദേഹം പറഞ്ഞു.

വിദ്യാഭ്യാസ വകുപ്പിന്റെ ചുമതലയുള്ള പി. കെ. കുഞ്ഞാലിക്കുട്ടിയാണ് മന്ത്രിസഭാ ഉപസമിതിയുടെ കണ്‍വീനര്‍. കെ. എം. മാണി, കെ. ശങ്കരനാരായണന്‍, പി. ശങ്കരന്‍ എന്നിവരാണ് സമിതിയിലെ മറ്റംഗങ്ങള്‍. ഫീസ് നിശ്ചയിക്കുന്നതിന് ബന്ധപ്പെട്ട എല്ലാവരുമായും സമിതി ചര്‍ച്ച നടത്തും. സ്വാശ്രയകോളജ് പ്രവേശനത്തിലെ ഇപ്പോഴത്തെ അനിശ്ചിതത്വം കണക്കിലെടുത്ത് ഉപസമിതിയുടെ ദൗത്യം എത്രയും വേഗം പൂര്‍ത്തിയാക്കണമെന്ന് നിര്‍ദേശിച്ചിട്ടുണ്ട്.

എല്ലാവര്‍ക്കും സ്വീകാര്യമായ ഒരു ഫീസ് ഫോര്‍മുല നിശ്ചയിക്കാനാണ് സര്‍ക്കാര്‍ താത്പര്യപ്പെടുന്നത്. സ്വാശ്രയ മേഖലയില്‍ ഏതെങ്കിലും തരത്തിലുള്ള പ്രതിസന്ധി ഒഴിവാക്കുന്നതിന് എല്ലാവരും സഹകരിക്കണം.

അടുത്ത വര്‍ഷത്തെ പ്രവേശനത്തിന് ഫീസും മറ്റ് മാര്‍ഗരേഖകളും നിശ്ചയിക്കുന്നതിന് സുപ്രിം കോടതി നിര്‍ദേശിച്ചതു പോലെ കമ്മിറ്റി രൂപീകരിക്കുന്നതിന് നടപടികള്‍ സ്വീകരിച്ചിട്ടുണ്ട്.

ഐ എ എസ് ഉദ്യോഗസ്ഥതലത്തില്‍ അഴിച്ചുപണി നടത്താനും മന്ത്രിസഭ തീരുമാനിച്ചു. വ്യവസായ വികസന കോര്‍പ്പറേഷന്‍ മാനേജിംഗ് ഡയറക്ടറായ ജിജി തോംസണെ വ്യവസായ സെക്രട്ടറിയാക്കാന്‍ തീരുമാനിച്ചു.