കേരളത്തില്‍ ജൈവസാങ്കേതിക വ്യവസായങ്ങള്‍ വേണം: മാണി

തിരുവനന്തപുരം: ജൈവ സാങ്കേതിക വിദ്യഉപയോഗിച്ചുള്ള വ്യവസായങ്ങള്‍ക്ക് കേരളം പ്രാധാന്യം നല്‍കണമെന്ന് മന്ത്രി കെ. എം. മാണി അഭിപ്രായപ്പെട്ടു.

ഫോക്കാന അന്തര്‍ദേശീയ സമ്മേളനം 2003-ലെ വ്യവസായ സമ്മേളനം ഉദ്ഘാടനം ചെയ്യുകയായിരുന്നു മന്ത്രി മാണി.

കുറഞ്ഞവിലയ്ക്ക് ഗുണനിലവാരമുള്ള ഉല്പന്നങ്ങള്‍ ഉണ്ടാക്കി ആഗോള വിപണിയിലെത്തിച്ച് വേണം കേരളം നാം ഇന്ന് നേരിടുന്ന പ്രതിസന്ധിയെ മറികടക്കേണ്ടത്. ആഗോളവത്കരണം എന്ന യാഥാര്‍ഥ്യത്തെ നമുക്ക് അവഗണിയ്ക്കാനാവില്ല. ഇതിനെ നേരിടാനുള്ള സൗകര്യങ്ങള്‍ കേരളത്തിനുണ്ട്.

വിവരസാങ്കേതിക വിദ്യ, ജൈവ സാങ്കേതിക വിദ്യ, പരിസ്ഥിതി വിനോദ സഞ്ചാരം എന്നീ മേഖലകള്‍ക്കാണ് കേരളം പ്രാധാന്യം നല്‍കേണ്ടത്. ഇതിനായുള്ള നിയമങ്ങള്‍ തയാറായിക്കഴിഞ്ഞു. കുറഞ്ഞപക്ഷം ഓരോ വിദേശ മലയാളിയും അവരെ വളര്‍ത്തിയഗ്രാമങ്ങളില്‍ ഒരു ചെറുകിട വ്യവസായം സംരംഭം തുടങ്ങേണ്ടതാണ്. കാര്‍ഷിക ഉല്പന്നങ്ങള്‍ ഉണ്ടാക്കാനുള്ള ശ്രമങ്ങളാണ് വേണ്ടത്. അതിന് നമ്മുടെ ഗ്രാമങ്ങളെ വേണ്ടവിധം പ്രയോജനപ്പെടുത്താമെന്നും മന്ത്രി പറഞ്ഞു.

അന്യനാടിനോട് ഏറ്റവും കൂടുതല്‍ വിധേയത്വം പുലര്‍ത്തേണ്ട ജനസമൂഹം മലയാളികളാണെന്ന് യോഗത്തില്‍ അധ്യക്ഷതവഹിച്ച മന്ത്രി ജി.കാര്‍ത്തികേയന്‍ പറഞ്ഞു.

സാമ്പത്തിക ഏജന്‍സികളില്‍ നിന്ന് കടമെടുത്തുകൊണ്ട് കേരളത്തെ പുതിയ ദിശയിലേക്ക് നയിക്കുവാന്‍ സര്‍ക്കാര്‍ ശ്രമിക്കുകയാണെന്ന് മന്ത്രി ചെര്‍ക്കളം അബ്ദുള്ള ചൂണ്ടിക്കാട്ടി. ഈ കടങ്ങള്‍ മറികടക്കണമെങ്കില്‍ ഇവിടെ വ്യവസായങ്ങള്‍ പുഷ്ടിപ്പെടണം.

യോഗത്തില്‍ പി.ജെ.കുര്യന്‍, സതീഷ് നമ്പൂതിരിപ്പാട്, ബേബി ഊരാളില്‍, സേവി മാത്യു, രാജു വര്‍ഗീസ് എന്നിവര്‍ പ്രസംഗിച്ചു.