മുന്‍ കമ്യൂണിസ്റാവാനില്ല: ഗോവിന്ദപിള്ള

തിരുവനന്തപുരം: സി പി എമ്മുമായി ഇനിയും സഹകരിക്കുമെന്നും മുന്‍ കമ്യൂണിസ്റാവാന്‍ തനിക്ക് താത്പര്യമില്ലെന്നും സി പി എം സംസ്ഥാന കമ്മിറ്റിയില്‍ നിന്ന് പുറത്താക്കപ്പെട്ട പി. ഗോവിന്ദപിള്ള പറഞ്ഞു.

പാര്‍ട്ടി പറയുന്നത് താന്‍ അച്ചടക്ക ലംഘനം നടത്തിയെന്നാണ്. പാര്‍ട്ടി പറയുന്നത് അംഗീകരിക്കുന്നു. തുടര്‍ന്നും പാര്‍ട്ടിയുമായി സഹകരിക്കും.

തനിക്കെതിരായ നടപടി സ്വീകരിക്കാന്‍ കാരണമായ വിവാദ അഭിമുഖത്തില്‍ തെറ്റുകള്‍ പലതും കടന്നുകൂടിയിട്ടുണ്ട്. താന്‍ പറയാത്ത കാര്യങ്ങള്‍ പലതും അതില്‍ ചേര്‍ത്തിട്ടുണ്ട്. സാഹചര്യത്തില്‍ നിന്ന് അടര്‍ത്തിമാറ്റിയാണ് പലതും ചേര്‍ന്നിട്ടുള്ളത്. അഭിമുഖത്തിനെതിരെ പ്രസ്താവനയിറക്കിയാല്‍ അങ്ങനെ ചെയ്താല്‍ രാഷ്ട്രീയക്കാര്‍ മുഴുവന്‍ നല്ലവരും പത്രക്കാര്‍ മുഴുവന്‍ മോശക്കാരും ആണെന്നാവും.

ഇ. എം. എസിനെ കുറിച്ച് താന്‍ പറഞ്ഞത് തെറ്റിദ്ധരിക്കപ്പെടുകയായിരുന്നു. അഭിമുഖം സംബന്ധിച്ച് പാര്‍ട്ടിക്ക് നല്‍കിയ വിശദീകരണത്തില്‍ ഉറച്ചുനില്‍ക്കുന്നു- ഗോവിന്ദപിള്ള വ്യക്തമാക്കി.