ഫെരാരി: സുപ്രിം കോടതിയില്‍ ഹര്‍ജി നല്‍കും

കൊച്ചി: സച്ചിന്‍ ടെണ്ടുല്‍ക്കറിന് സമ്മാനമായി ലഭിച്ച ഫെരാരി കാറിന് നികുതി ഇളവ് അനുവദിച്ച നടപടിക്കെതിരെ സുപ്രിം കോടതിയെ സമീപിക്കുമെന്ന് ഹൈക്കോടതിയില്‍ ഹര്‍ജി സമര്‍പ്പിച്ച പരാതിക്കാരന്‍ ഡിവിഷന്‍ ബെഞ്ചിനെ അറിയിച്ചു. ഇതേ തുടര്‍ന്ന് ഹര്‍ജിയിന്‍മേലുള്ള വിചാരണ ഹൈക്കോടതി ഉപേക്ഷിച്ചു.

സച്ചിന്റെ ഫെരാരി കാര്‍ ഇന്ത്യയില്‍ കൊണ്ടുവരുന്നതിന് 1.13 കോടിയുടെ നികുതി ഇളവ് ചെയ്തുകൊടുത്തതിനെതിരെ വിദേശമലയാളിയായ സാനു ജോ മാത്യുവാണ് ഹൈക്കോടതിയെ സമീപിച്ചത്. ആഗസ്ത് 25 തിങ്കളാഴ്ച ഹര്‍ജിയിന്‍മേല്‍ വാദം കേള്‍ക്കാന്‍ ചേര്‍ന്നപ്പോള്‍ സുപ്രിം കോടതിയെ സമീപിക്കാന്‍ ഉദ്ദേശിക്കുന്നതായി ഹര്‍ജിക്കാരന്റെ അഭിഭാഷകന്‍ ഡിവിഷന്‍ ബെഞ്ചിനെ അറിയിക്കുകയായിരുന്നു.

സച്ചിന്‍ ടെണ്ടുല്‍ക്കര്‍ക്ക് നികുതിയിളവ് അനുവദിച്ചത് നിയമവിരുദ്ധവും വിവേചനപരവുമാണെന്നും ചൂണ്ടിക്കാട്ടിയാണ് പരാതിക്കാരന്‍ ഹര്‍ജി നല്‍കിയത്.

കസ്റംസ് നിയമം അനുസരിച്ച് നികുതിയിളവ് അനുവദിക്കുന്നത് പൊതുതാത്പര്യത്തിന് വേണ്ടിയായിരിക്കണം. ഇക്കാര്യം ഗസറ്റില്‍ വിജ്ഞാപനം ചെയ്യുകയും വേണം. സച്ചിന്‍ ടെണ്ടുല്‍ക്കര്‍ക്ക് നികുതിയിളവ് അനുവദിച്ചതില്‍ യാതൊരു പൊതുതാത്പര്യവുമില്ലെന്ന് ഹര്‍ജിയില്‍ ചൂണ്ടിക്കാട്ടി.