സ്വാശ്രയ കോളെജുകളിലെ പ്രവേശനം തടഞ്ഞു

തിരുവനന്തപുരം: സംസ്ഥാനത്തെ വിവിധ സ്വാശ്രയ പ്രൊഫണല്‍ കോളെജുകളിലെ വിദ്യാര്‍ഥി പ്രവേശനം ആഗസ്ത് 25 തിങ്കളാഴ്ച ഇടതുവിദ്യാര്‍ഥി സംഘടനകള്‍ തടഞ്ഞു.

സ്വാശ്രയ പ്രൊഫണല്‍ കോളെജുകളിലെ മെറിറ്റ് സീറ്റുകളില്‍ ഫീസ് കുറയ്ക്കണമെന്ന് ആവശ്യപ്പെട്ടാണ് ഇടതുവിദ്യാര്‍ഥി സംഘടനകള്‍ പ്രവേശനം തടഞ്ഞത്.

വിദ്യാര്‍ഥികളുടെ പ്രതിഷേധം മൂലം പല കോളെജുകളിലും പ്രവേശനം തടസപ്പെട്ടു. ചില കോളെജുകളില്‍ പ്രവേശനം നടന്നെങ്കിലും വിദ്യാര്‍ഥികളില്‍ നിന്ന് ഫീസ് വാങ്ങിയില്ല.

തിരുവനന്തപുരത്തെ എട്ട് സ്വാശ്രയ എഞ്ചിനീയറിംഗ് കോളെജുകളിലെ പ്രവേശനം വിദ്യാര്‍ഥി പ്രവര്‍ത്തകര്‍ തടഞ്ഞു. എറണാകുളം കാക്കനാട്ടെ രാജഗിരി എഞ്ചിനീയറിംഗ് കോളെജിലേക്ക് മാര്‍ച്ച് നടത്തിയ എസ് എഫ് ഐ പ്രവര്‍ത്തകരെ പൊലീസ് ലാത്തിച്ചാര്‍ജ് ചെയ്തു.

വടകര സഹകരണ സ്വാശ്രയ എഞ്ചിനീയറിംഗ് കോളെജിലെ പ്രവേശനം മാറ്റിവച്ചു. പ്രവേശനം തടയാനെത്തിയ വിദ്യാര്‍ഥി സംഘടനാ നേതാക്കളുമായി പ്രിന്‍സിപ്പല്‍ ചര്‍ച്ച നടത്തിയതിനെ തുടര്‍ന്നാണ് പ്രവേശനം മാറ്റിവച്ചത്.