ഇന്ത്യ നേരിടുന്നത് പുതിയ യുദ്ധം: അദ്വാനി
മുംബൈ: ഇന്ത്യ പുതിയൊരു തരം യുദ്ധത്തെയാണ് നേരിടുന്നതെന്ന് ഉപപ്രധാനമന്ത്രി എല്.കെ. അദ്വാനി. സ്ഫോടനം നടന്ന സാവേരി ബസാര് സന്ദര്ശിച്ചശേഷം വാര്ത്താലേഖകരോട് സംസാരിക്കുകയായിരുന്നു അദ്ദേഹം.
സാധാരണക്കാരനെയും കുട്ടികളെയും സ്ത്രീകളെയും ഭീതിയിലേക്ക് വലിച്ചിടുന്ന തരത്തിലുള്ളതാണ് തീവ്രവാദത്തിന്റെ ഈ പുതിയ യുദ്ധമുഖം. ജമ്മുകശ്മീരിലും പഞ്ചാബിലും തീവ്രവാദികള് ഇത്തരം രീതികള് നേരത്തെ പരീക്ഷിച്ചതാണ്. സൈനികര് മാത്രം കൊല്ലപ്പെടുന്ന നേരത്തെയുള്ള യുദ്ധത്തില് നിന്ന് വ്യത്യസ്തമാണിത്. - അദ്വാനി പറഞ്ഞു.
മഹാരാഷ്ട്ര സര്ക്കാരും കേന്ദ്രവും ഒറ്റക്കെട്ടായി തീവ്രവാദത്തെ നേരിടുമെന്നും അദ്വാനി പറഞ്ഞു. മഹാരാഷ്ട്രസര്ക്കാരിന് കേന്ദ്രവും ഇന്റലിജന്സ് ഏജന്സികളും എല്ലാതരം സഹായങ്ങളും നല്കും.
മഹാരാഷ്ടസര്ക്കാരിനെ പിരിച്ചുവിടണമെന്ന് ആര്എസ്എസ്-ബിജെപി ആവശ്യത്തെക്കുറിച്ച് ആരാഞ്ഞപ്പോള്, താന് ഇവിടെ എത്തിയത് തീവ്രവാദത്തെ നേരിടുന്നതിന് സംസ്ഥാനസര്ക്കാരുമായി ഒത്തൊരുമിച്ച് പ്രവര്ത്തിക്കാനാണെന്ന് അദ്വാനി പറഞ്ഞു.