അയ്യങ്കാളിപ്പട കൊക്കകോള ഗോഡൗണ്‍ ആക്രമിച്ചു

കൊച്ചി: കടവന്ത്രയിലെ കൊക്കകോള കമ്പനിയുടെ ഗോഡൗണ്‍ അയ്യങ്കാളിപ്പട ആക്രമിച്ചു. ഗോഡൗണിലേക്ക് ബോംബെറിയുകയും ഗോഡൗണിനകത്തെ കുപ്പികള്‍ പുറത്ത് വലിച്ചിട്ട് കത്തിയ്ക്കുകയും ചെയ്തു.

ആഗസ്ത് 29 വെള്ളിയാഴ്ച രാവിലെ 10 മണിയോടെയാണ് പൊന്നേത്ത് ടെമ്പിള്‍ റോഡിലെ ഫെയ്മസ് മാര്‍ക്കറ്റിന്റെ ഗോഡൗണില്‍ 20 ഓളം വരുന്ന അയ്യങ്കാളിപ്പട ആക്രമണം നടത്തിയത്.

വടിവാള്‍ ഉള്‍പ്പെടെയുള്ള മാരകായുധങ്ങളുമായി മുദ്രാവാക്യം മുഴക്കിയെത്തുകയായിരുന്നു അയ്യങ്കാളിപ്പട പ്രവര്‍ത്തകര്‍. ഗോഡൗണിലെ മുഴുവന്‍ ജീവനക്കാരോടും പുറത്തിറങ്ങി നില്ക്കാന്‍ ആവശ്യപ്പെട്ടു. ജീവനക്കാര്‍ പുറത്തിറങ്ങിയപ്പോള്‍ മൂന്ന് കന്നാസുകളിലായി കൊണ്ടുവന്ന മണ്ണെണ്ണയും ഡീസലും കൊക്കകോളയുടെ വിവിധ ഉല്പന്നങ്ങള്‍ സൂക്ഷിച്ച കെയ്സുകള്‍ക്ക് മുകളില്‍ ഒഴിച്ച് തീകൊടുത്തു.

ഗോഡൗണിനുള്ളിലേക്ക് ഒരു പെട്രോള്‍ ബോംബ് ഇവര്‍ വലിച്ചെറിയുകയും ചെയ്തതായി പറയുന്നു. കൊക്കകോളകുപ്പികള്‍ വന്‍ ശബ്ദത്തോടെ പൊട്ടിത്തെറിയ്ക്കുന്നത് കേള്‍ക്കാമായിരുന്നു എന്ന് ദൃക്സാക്ഷികള്‍ പറയുന്നു.

യുവാക്കളുടെ സംഘം അക്രമത്തിന് ശേഷം ലഘുലേഖ വിതറി. ബഹുരാഷ്ട്രകുത്തകക്കമ്പനിയുടെ ഉല്പന്നങ്ങള്‍ ബഹിഷ്കരിയ്ക്കുക എന്ന ആഹ്വാനമായിരുന്ന അയ്യങ്കാളിപ്പടയുടെ ഈ ലഘുലേഖകളില്‍.

സംഭവത്തെ തുടര്‍ന്ന് പൊലീസ് ജില്ലയിലെ മറ്റ് കൊക്കകോള ഗോഡൗണുകളില്‍ കാവല്‍ ശക്തമാക്കി.