എസ്എന്‍ഡിപി മനസാക്ഷി വോട്ട് ചെയ്യും

കോഴിക്കോട്: എറണാകുളം ഉപതിരഞ്ഞെടുപ്പില്‍ മനസാക്ഷി വോട്ട് ചെയ്യാനാണ് പ്രവര്‍ത്തകര്‍ക്ക് നിര്‍ദേശം നല്‍കിയിരിക്കുന്നതെന്ന് എസ് എന്‍ ഡി പി യോഗം പ്രസിഡന്റ് സി. കെ. വിദ്യാസാഗര്‍ പറഞ്ഞു.

യു ഡി എഫ് സ്ഥാനാര്‍ഥിക്ക് വോട്ട് ചെയ്യാന്‍ എസ് എന്‍ ഡി പി തീരുമാനിച്ചിട്ടില്ല. മറിച്ചുള്ള വാര്‍ത്തകള്‍ മാധ്യമങ്ങളുടെ സൃഷ്ടി മാത്രമാണ്. സപ്തംബര്‍ 10 ബുധനാഴ്ച മലബാര്‍ പാലസില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.

എറണാകുളം ഉപതിരഞ്ഞെടുപ്പ് ജനകീയവേദി ഗൗരവമായി കാണുന്നില്ല. അതുകൊണ്ട് എറണാകുളം തിരഞ്ഞെടുപ്പില്‍ ഇടപെടാന്‍ ഉദ്ദേശിക്കുന്നില്ല. എറണാകുളത്ത് 20 ശതമാനത്തോളം വോട്ട് എസ് എന്‍ ഡി പിക്കുണ്ട്. എന്നാല്‍ നയപരമായ പരീക്ഷണം നടത്താന്‍ പറ്റിയ മണ്ഡലമല്ല എറണാകുളം എന്നതിനാല്‍ തിരഞ്ഞെടുപ്പില്‍ എസ് എന്‍ ഡി പി ഇടപെടുന്നില്ല.

മുഖ്യമന്ത്രിയുടെ ന്യൂനപക്ഷ പ്രസ്താവനയുടെ പശ്ചാത്തലത്തില്‍ എറണാകുളത്ത് പൊതുഹിന്ദുസ്ഥാനാര്‍ഥിയെ നിര്‍ത്തുക എന്ന ആശയം ബി ജെ പിയുടേതായിരുന്നു. എന്നാല്‍ എറണാകുളത്തു ഈ ആശയം പരീക്ഷിക്കാനാവില്ല എന്നതിനാല്‍ എസ് എന്‍ ഡി പി പിന്‍മാറുകയായിരുന്നു.

കേരളത്തിലെ പിന്നോക്ക വിഭാഗങ്ങളെ രാഷ്ട്രീയ മുഖ്യധാരയിലേക്ക് അടുപ്പിക്കാന്‍ ഇരുമുന്നണികളെയും തകര്‍ക്കേണ്ടിവരുന്ന സ്ഥിതിയാണെങ്കില്‍ അതിനുള്ള തന്ത്രം എസ് എന്‍ ഡി പി ആവിഷ്കരിക്കുമെന്ന് വിദ്യാസാഗര്‍ പറഞ്ഞു.