ബേക്കലില് ലീല ഗ്രൂപ്പിന്റെ റിസോര്ട്ട്
ബാംഗ്ലൂര്: കാസര്കോട് ജില്ലയിലെ ബേക്കലില് ലീല ഗ്രൂപ്പ് ബീച്ച് റിസോര്ട്ട് സ്ഥാപിക്കുമെന്ന് ലീല ഗ്രൂപ്പ് വൈസ് ചെയര്മാനും മാനേജിംഗ് ഡയറക്ടറുമായ വിവേക് നായര് അറിയിച്ചു.
ഇതിനായി സിങ്കപ്പൂരിലെ അമ്മന് റിസോര്ട്സുമായി കരാറിലേര്പ്പെട്ടിട്ടുണ്ട്. രണ്ട് ദശകം മുമ്പ് ലോക വിനോദസഞ്ചാര പ്രൊമോഷന് കൗണ്സില് ഈ പദ്ധതിയുടെ സാധ്യത തിരിച്ചറിഞ്ഞിരുന്നുവെന്നും 15 വര്ഷത്തിന് ശേഷം പദ്ധതിക്ക് കേരള സര്ക്കാര് അനുമതി നല്കിയിരിക്കുകയാണെന്നും വിവേക് നായര് പറഞ്ഞു.
മൂന്ന് മാസങ്ങള്ക്കുള്ളില് ജോലി ആരംഭിക്കും. 65 കോടിയാണ് ഈ പദ്ധതിക്കായി നിക്ഷേപിക്കുന്നത്.
അമ്മന് റിസോര്ട്സിന്റെ ഇന്ത്യയിലെ ആദ്യത്തെ പദ്ധതിയാണിത്. രാത്രിക്ക് 650 ഡോളര് (32000 രൂപ) ഈടാക്കുന്ന ഏറ്റവും മെച്ചപ്പെട്ട റിസോര്ട്ട് ശൃംഖലകളിലൊന്നാണ് അമ്മന് റിസോര്ട്സ്. സിനിമാ താരങ്ങളെ പോലുള്ള വിശിഷ്ടവ്യക്തികളെയാണ് റിസോര്ട്സ് ലക്ഷ്യമിടുന്നത്.
ബാംഗ്ലൂരിലെ ലീലാ പാലസ് ഹോട്ടലില് പുതുതായി 44 മുറികള് കൂടി പണിയും. ഇപ്പോള് ഇവിടെ 252 മുറികളാണ് ഉള്ളത്. ഈ വര്ഷം ബാംഗ്ലൂരിലെ ലീലാ പാലസില് 85 ശതമാനം മുറികളിലും എല്ലാ ദിവസവും താമസക്കാരുണ്ടായിരുന്നു. ഐടി രംഗമാണ് ലീലാ പാലസിന് സഹായകരമായ ഘടകം. - വിവേക് നായര് പറഞ്ഞു.