ജോണിനെതിരെ കരുണാകരന്‍ നേരിട്ട്

കൊച്ചി: കോണ്‍ഗ്രസ് സ്ഥാനാര്‍ത്ഥിയായ എ ഗ്രൂപ്പുകാരന്‍ എം.ഒ. ജോണിനെ തറപറ്റിയ്ക്കാന്‍ കെ. കരുണാകരന്‍ എറണാകുളത്ത് നേരിട്ട് ഇറങ്ങി. ഐ ഗ്രൂപ്പ് പ്രവര്‍ത്തകരെ നേരില്‍ കണ്ട് കരുണാകരന്‍ ജോണിനെ തോല്പിക്കാന്‍ ആഹ്വാനം ചെയ്യുകയാണ്. ഇതോടെ എറണാകുളത്ത് കോണ്‍ഗ്രസിലെ ഗ്രൂപ്പ് പോര് ശക്തമായി.

കരുണാകരന്‍ സപ്തംബര്‍ 13 ശനിയാഴ്ച പറവൂര്‍ ടിബിയില്‍ കോണ്‍ഗ്രസ് ഐ വിഭാഗം പ്രവര്‍ത്തകരുമായി കൂടിക്കാഴ്ച നടത്തി. ഞാറയ്ക്കല്‍, പറവൂര്‍ മണ്ഡലങ്ങളിലുള്ള പ്രവര്‍ത്തകരുമായാണ് കൂടിക്കാഴ്ച നടത്തിയത്. എം.ഒ. ജോണിനെ തോല്പിക്കാനുള്ള തന്ത്രങ്ങള്‍ പ്രവര്‍ത്തകര്‍ക്ക് അദ്ദേഹം വിശദീകരിച്ച് കൊടുത്തതായി അറിയുന്നു.

ശനിയാഴ്ച ഉച്ചകഴിഞ്ഞ് അദ്ദേഹം ആലുവയിലെ ഐ ഗ്രൂപ്പ് പ്രവര്‍ത്തകരെയും കണ്ടു. വെള്ളിയാഴ്ച രാത്രിയിലും കരുണാകരന്‍ എറണാകുളം ജില്ലയിലെ ഐ വിഭാഗം നേതാക്കളുമായി കൂടിക്കാഴ്ച നടത്തിയിരുന്നു. എം.ഒ. ജോണ്‍ ഐ വിഭാഗത്തിന്റെ സ്ഥാനാര്‍ത്ഥിയല്ലെന്നും ആന്റണിയുടെ സ്ഥാനാര്‍ത്ഥിയെ ജയിപ്പിക്കേണ്ട ബാധ്യത ഐ ഗ്രൂപ്പ് പ്രവര്‍ത്തകര്‍ക്കില്ലെന്നും കരുണാകരന്‍ ഗ്രൂപ്പ് പ്രവര്‍ത്തകരോട് പറഞ്ഞു.

എ വിഭാഗവും മറുഭാഗത്ത് ശക്തമായി കച്ചമുറുക്കുകയാണ്. മുഖ്യമന്ത്രിയും മുതിര്‍ന്ന കോണ്‍ഗ്രസ് നേതാക്കളും എല്ലാ മന്ത്രിമാരും അടുത്തയാഴ്ച മുതല്‍ എറണാകുളത്ത് പര്യടനം നടത്തും. പള്ളിവഴിയും എം.ഒ. ജോണിന് വേണ്ടി പരമാവധി പ്രചാരണം നടത്താന്‍ എ വിഭാഗം ശ്രമിയ്ക്കുന്നുണ്ട്. ലത്തീന്‍ കത്തോലിക്ക വിഭാഗത്തെ ഒറ്റക്കെട്ടായി അണിനിരത്തുന്നതില്‍ എ വിഭാഗം വിജയിച്ചിട്ടുണ്ട്.