ഇസ്രയേല്വിരുദ്ധപ്രമേയം യുഎസ് തടഞ്ഞു
യുണൈറ്റഡ് നാഷന്സ്: പലസ്തീന് നേതാവ് യാസര് അരാഫത്തിനെ നാടുകടത്താനുള്ള ഇസ്രയേല് തീരുമാനത്തെ അപലപിക്കുന്ന യുഎന് പ്രമേയം യുഎസ് വീറ്റോ ചെയ്തു. ഇതുമൂലം ഈ പ്രമേയം പാസായില്ല.
അരാഫത്തിനെതിരായ നടപടിയില് നിന്നും പിന്മാറാന് ഇസ്രയേലിനോട് ആവശ്യപ്പെടുന്നതാണ് ഈ പ്രമേയം. അരാഫത്തിന്റെ ജീവന് ഹാനികരമായ പ്രവര്ത്തികളില് നിന്നും വിട്ടുനില്ക്കാനും പ്രമേയം ഇസ്രയേലിനോട് ആവശ്യപ്പെടുന്നു.
പക്ഷെ പലസ്തീന് തീവ്രവാദി സംഘടനയായ ഹമാസിന്റെ പ്രവര്ത്തികളെ അപലപിച്ചിട്ടില്ലെന്ന കാരണം പറഞ്ഞാണ് യുഎസ് ഈ പ്രമേയത്തെ വീറ്റോ ചെയ്തത്. 15 രാഷ്ട്രങ്ങള് ഈ പ്രമേയത്തിന് അനുകൂലമായി വോട്ട് ചെയ്തു. ബ്രിട്ടന്, ജര്മ്മനി, ബള്ഗേറിയ എന്നീ രാഷ്ട്രങ്ങള് വോട്ടെടുപ്പില് നിന്നും വിട്ടുനിന്നു.
ഐക്യരാഷ്ട്രസമിതിയില് ഇതൊരു കറുത്തദിനമാണെന്ന് പിന്നീട് പലസ്തീന് വക്താവ് സായെബ് എറാകത്ത് പറഞ്ഞു. ലോകാഭിപ്രായത്തെ തള്ളിക്കളഞ്ഞ യുഎസിന് ഇനി പശ്ചിമേഷ്യയിലെ സമാധാനശ്രമങ്ങള്ക്ക് മധ്യസ്ഥത വഹിക്കാന് അര്ഹതയില്ലെന്ന് ഐക്യരാഷ്ട്രസമിതിയിലെ പലസ്തീന് നിരീക്ഷകന് നാസര് അല്-കിദ്വ പറഞ്ഞു. ഈ വീറ്റോയിലൂടെ കാര്യങ്ങള് വീണ്ടും സങ്കീര്ണ്ണമാകുകയാണെന്ന് സിറിയയുടെ പ്രതിനിധി പറഞ്ഞു.