സിപിഐ കളക്ടറേറ്റുകള്‍ ഉപരോധിച്ചു

തിരുവനന്തപുരം: ആന്റണി സര്‍ക്കാരിന്റെ ജനവിരുദ്ധനയങ്ങളില്‍ പ്രതിഷേധിച്ച് സിപിഐ സംസ്ഥാനവ്യാപകമായി കളക്ടറേറ്റുകള്‍ ഉപരോധിച്ചു. തിരുവനന്തപുരത്ത് സെക്രട്ടേറിയറ്റ് ഉപരോധം സിപിഐ സംസ്ഥാന സെക്രട്ടറി വെളിയം ഭാര്‍ഗ്ഗവന്‍ ഉദ്ഘാടനം ചെയ്തു.

ജനങ്ങളെ ബുദ്ധിമുട്ടിക്കുന്ന നയങ്ങളിലൂടെ ആന്റണി ജനങ്ങളില്‍ നിന്ന് ഒറ്റപ്പെടുകയാണെന്ന് വെളിയം ഭാര്‍ഗ്ഗവന്‍ ആരോപിച്ചു. സംസ്ഥാനത്ത് ഇപ്പോള്‍ മാഫിയാ സംഘങ്ങളാണ് ഭരിയ്ക്കുന്നത്. ഇങ്ങിനെ പോയാല്‍ സര്‍ക്കാരിനെതിരെ ശക്തമായി തിരിച്ചടിക്കേണ്ടിവരുമെന്നും വെളിയം ഭാര്‍ഗ്ഗവന്‍ പറഞ്ഞു.

പന്ന്യന്‍ രവീന്ദ്രന്‍, മാങ്ങോട് രാധാകൃഷ്ണന്‍ എന്നിവരും പ്രസംഗിച്ചു. സെക്രട്ടേറിയറ്റ് ഗെയ്റ്റ് തുറന്ന് അകത്തുകടക്കാന്‍ ശ്രമിച്ച പ്രവര്‍ത്തകരെ പൊലീസ് അറസ്റ് ചെയ്യാന്‍ ശ്രമിച്ചപ്പോള്‍ നേരിയ സംഘര്‍ഷമുണ്ടായി. എങ്കിലും സംസ്ഥാനത്ത് ഒരിടത്തുനിന്നും അനിഷ്ടസംഭവങ്ങള്‍ റിപ്പോര്‍ട്ട് ചെയ്തിട്ടില്ല.

കോഴിക്കോട് കളക്ടറേറ്റ് ഉപരോധം ബിനോയ് വിശ്വം എംഎല്‍എ ഉദ്ഘാടനം ചെയ്തു. ഇവിടെ കളക്ടറേറ്റ് പ്രവര്‍ത്തനം പൂര്‍ണ്ണമായും സ്തംഭിച്ചു.