നാരാണന്‍നമ്പൂതിരി ഗുരുവായൂര്‍ മേല്‍ശാന്തി

ഗുരുവായൂര്‍: ഗുരുവായൂര്‍ ക്ഷേത്രത്തില്‍ പുതിയ മേല്‍ശാന്തിയായി ഓതിക്കന്‍ കുടുംബത്തില്‍പെട്ട പൊട്ടക്കുഴി നാരായണന്‍ നമ്പൂതിരി (43) തിരഞ്ഞെടുക്കപ്പെട്ടു. ക്ഷേത്രത്തില്‍ ഒക്ടോബര്‍ ഒന്നിന് ഇദ്ദേഹം ചുമതലയേല്ക്കും. ആറ് മാസത്തേക്കാണ് ഇദ്ദേഹത്തിന്റെ കാലാവധി.

നറുക്കെടുപ്പിലൂടെയാണ് 23 പേരില്‍ നിന്ന് നാരായണന്‍ നമ്പൂതിരിയെ തിരഞ്ഞെടുത്തത്. 30 പേര്‍ മേല്‍ശാന്തിയാവാന്‍ അപേക്ഷിച്ചിരുന്നു. യോഗ്യതാനിര്‍ണ്ണയത്തിനും കൂടിക്കാഴ്ചയ്ക്കും ശേഷം 23 പേരെ അന്തിമറൗണ്ടിലേക്ക് തിരഞ്ഞെടുത്തു. അവരില്‍ നിന്നാണ് നറുക്കെടുപ്പിലൂടെ നാരായണന്‍ നമ്പൂതിരിയെ തിരഞ്ഞെടുത്തത്.

ഇപ്പോഴത്തെ മേല്‍ശാന്തി താമറ്റൂര്‍ നാരായണന്‍നമ്പൂതിരിയാണ് നറുക്കെടുത്തത്. ക്ഷേത്രത്തിലെ പാരമ്പര്യാവകാശികളാണ് പൊട്ടക്കുഴി ഓതിക്കന്‍കുടുംബം. നാരായണന്‍ നമ്പൂതിരി 16ാംവയസ്സില്‍ ഗുരുവായൂരപ്പന് പൂജ ചെയ്തുതുടങ്ങി.

കാഞ്ചി ശങ്കരാചാര്യരില്‍ നിന്ന് തന്ത്രരത്നം ബഹുമതി ലഭിച്ച ഇദ്ദേഹം 40ഓളം ക്ഷേത്രങ്ങളില്‍ തന്ത്രിയാണ്. അങ്കമാലി കൈപ്പിള്ളി വാസുദേവന്‍ നമ്പൂതിരിയുടെ മകള്‍ അനിത അന്തര്‍ജ്ജനമാണ് ഭാര്യ. മക്കള്‍: അപര്‍ണ, വാസുദേവന്‍, ശ്രീനാഥ് എന്നിവര്‍.