ഇറാഖ് പ്രതിരോധമന്ത്രി കീഴടങ്ങി

ബാഗ്ദാദ്: ഇറാഖിന്റെ മുന്‍ പ്രതിരോധമന്ത്രി സുല്‍ത്താന്‍ ഹഷിം അഹ്മദ് അല്‍ താല്‍ യുഎസ് സേനയ്ക്ക് മുമ്പാകെ കീഴടങ്ങിയതായി അല്‍ ജസീറ ടെലിവിഷന്‍ റിപ്പോര്‍ട്ട് ചെയ്തു. ഒരു മധ്യസ്ഥനെ ഉദ്ധരിച്ചുകൊണ്ടാണ് അല്‍ ജസീറ ഇക്കാര്യം റിപ്പോര്‍ട്ട് ചെയ്തത്.

വടക്കന്‍ ഇറാഖിലെ നഗരമായ മൊസൂലില്‍ വച്ചാണ് സുല്‍ത്താന്‍ ഹഷിം അഹ്മദ് അല്‍ താല്‍ കീഴടങ്ങിയതെന്നും റിപ്പോര്‍ട്ടില്‍ പറയുന്നു. പക്ഷെ ഈ റിപ്പോര്‍ട്ട് യുഎസ് സ്ഥിരീകരിച്ചിട്ടില്ല. സദ്ദാം ഹുസൈനുള്‍പ്പെടെ യുഎസ് ഹിറ്റ് ലിസ്റിലുള്ള 55 പിടികിട്ടാപ്പുള്ളികളില്‍ 27ാമത്തെ വ്യക്തിയാണ് സുല്‍ത്താന്‍ ഹഷിം അഹ്മദ് അല്‍ താല്‍.

അതേ സമയം യുഎസ് സൈന്യത്തിന്റെ നാലാം ഇന്‍ഫന്‍ട്രി ഡിവിഷനില്‍ പെട്ട ഒരു സൈനികള്‍ ഷോക്കേറ്റ് മരിച്ചു. തിക്രിത്തിനടുത്ത് മൂന്ന് യുഎസ് സൈനികര്‍ സദ്ദാം അനുകൂലികളുടെ ആക്രമണത്തില്‍ കൊല്ലപ്പെട്ടു. ഒരു ഗ്രനേഡ് കേന്ദ്രം കണ്ടെത്താന്‍ ശ്രമിക്കുന്നതിനിടയിലാണ് മൂന്ന് യുഎസ് സൈനികര്‍ കൊല്ലപ്പെട്ടത്.