കേരളത്തില്‍ ജിഹാദികള്‍ : വിഎച്ച്പി

ദില്ലി: കേരളം ജിഹാദികളുടെ സുരക്ഷതിമായ ഒളിത്താവളമായി മാറിക്കൊണ്ടിരിക്കുകയാണെന്ന് വിഎച്ച്പി വര്‍ക്കിംഗ് പ്രസിഡന്റ് അശോക് സിംഗാള്‍ പറഞ്ഞു. ഇത് തടയാന്‍ കേന്ദ്രം ഉചിതമായ നടപടിയെടുക്കണമെന്നും അദ്ദേഹം ഒരു പ്രസ്താവനയില്‍ ആവശ്യപ്പെട്ടു.

കേരളത്തിന്റെ സാമുദായ സൗഹാര്‍ദ്ദം അട്ടിമറിയ്ക്കാന്‍ പാകിസ്ഥാന്റെ ഐഎസ്ഐ പിന്തുണയോടെ ജിഹാദി ശക്തികള്‍ ഗൂഢാലോചന നടത്തിവരുന്നുണ്ട്. ഇതിനെ തടയാന്‍ കേന്ദ്രം നടപടിയെടുക്കണം. - അശോക് സിംഗാള്‍ ആവശ്യപ്പെടുന്നു.

മുംബൈയിലെ ഇരട്ടസ്ഫോടനത്തിന് പിന്നില്‍ പ്രവര്‍ത്തിച്ചവരില്‍ പലരും കേരളത്തില്‍ നിന്നുള്ളവരാണ്. മര്‍മ്മപ്രധാനമായ സ്ഥലങ്ങളില്‍ തീവ്രവാദികള്‍ ആയുധങ്ങളും സ്ഫോടകവസ്തുക്കളും കുന്നുകൂട്ടുന്നുണ്ട്.

മെയ് രണ്ടിന്റെ മാറാട് കൂട്ടക്കൊലയുടെ പേരില്‍ ഇതുവരെ അറസ്റ് ചെയ്യപ്പെട്ടവര്‍ മുസ്ലിംലീഗ്, സിപിഎം, കോണ്‍ഗ്രസ് എന്നീ പാര്‍ട്ടികളില്‍ നിന്നുള്ളവരാണ്. കേരളം തീവ്രവാദികളുടെ ആസ്ഥാനമായി മാറിക്കഴിഞ്ഞുവെന്നതിന് ഇതും ഒരു തെളിവാണ്. മുംബൈ, മാറാട് സംഭവങ്ങളിലെ മുഴുവന്‍ വിശദാംശങ്ങളും പുറത്തുവരാന്‍ ഇരിയ്ക്കുന്നതേയുള്ളൂ. അതേ സമയം ഈ രണ്ടിടങ്ങളിലേയും തീവ്രവാദികള്‍ തമ്മില്‍ ബന്ധമുണ്ടെന്ന് തെളിഞ്ഞുകഴിഞ്ഞു. - അദ്ദേഹം വിശദമാക്കി.