വനം കയ്യേറ്റക്കാരെ ഒഴിപ്പിക്കാനായില്ല
കൊച്ചി: വനം കയ്യേറിയ ഭൂരിപക്ഷം പേരെയും ഒഴിപ്പിക്കാന് കഴിഞ്ഞിട്ടില്ലെന്ന് സര്ക്കാര് ചൊവാഴ്ച ഹൈക്കോടതിയെ അറിയിച്ചു.
1977 ജനവരി ഒന്നിന് ശേഷമുള്ള വനം കയ്യേറ്റത്തെക്കുറിച്ചും എത്ര പേരെ ഒഴിപ്പിക്കാന് കഴിഞ്ഞിട്ടുണ്ടെന്നും അറിയിയ്ക്കാന് ഹൈക്കോടതി സര്ക്കാരിനോട് ആവശ്യപ്പെട്ടിരുന്നു. അതിന് മറുപടിയായിട്ടാണ് സര്ക്കാരിന്റെ സത്യവാങ്ങ്മൂലം അഡീ. അഡ്വ. ജനറല് രാജന് ജോസഫ് ഹാജരാക്കിയത്.
സംസ്ഥാനത്ത് ഇപ്പോള് 1,51,226 വനം കയ്യേറ്റക്കാരുണ്ട്. മൊത്തം 11,917 ഹെക്ടര് വനഭൂമിയാണ് അവര് കൈവശം വച്ചിരിക്കുന്നത്. ഇതുവരെയായി ആകെ 4028 ഹെക്ടര് വനഭൂമിയാണ് തിരിച്ചു പിടിക്കാന് കഴിഞ്ഞിട്ടുള്ളത്. 1008 പേരെ ഒഴിപ്പിച്ചിട്ടുണ്ട്. അതായത് കൈയേറ്റക്കാരില് ഒരു ശതമാനം പേരെപ്പോലും സര്ക്കാരിന് ഒഴിപ്പിയ്ക്കാന് കഴിഞ്ഞിട്ടില്ലെന്നാണ്.
ഇടുക്കിയും കോട്ടയവും ഉള്പ്പെടുന്ന ഹൈറേഞ്ച് സര്ക്കിള് പ്രദേശത്താണ് ഏറ്റവും കൂടുതല് വനം കയ്യേറ്റക്കാര് ഉള്ളത്.
ഇടുക്കി, കോട്ടയം ഭാഗത്ത് 4426 ഹെക്ടര് വനഭൂമിയാണ് കയ്യേറിയിട്ടുള്ളത്. ഇതില് 2600 ഹെക്ടര് തിരിച്ചു പിടിച്ചു. 657 പേരെ ഒഴിപ്പിച്ചു.
വനം കയ്യേറ്റത്തില് രണ്ടാം സ്ഥാനം ഒലവക്കോട് ഭാഗത്ത്. മറ്റു ഭാഗങ്ങളിലും കയ്യേറ്റമുണ്ട്. കയ്യേറ്റക്കാരെ ഒഴിപ്പിക്കണമെന്ന് ആവശ്യപ്പെട്ടുകൊണ്ടുള്ള ഏതാനും പൊതുതാല്പര്യ ഹര്ജികള് ഇപ്പോള് ഹൈക്കോടതിയുടെ പരിഗണനയിലുണ്ട്.