സിബിഐ അന്വേഷണം വേണ്ട: മുരളി

തിരുവനന്തപുരം: മാറാട് കലാപത്തെക്കുറിച്ച് സിബിഐ അന്വേഷണം ആവശ്യമില്ലെന്ന് കെപിസിസി പ്രസിഡന്റ് കെ. മുരളീധരന്‍.

ഒക്ടോബര്‍ രണ്ട് വ്യാഴാഴ്ച ദേശീയ ബാലതരംഗം സംഘടിപ്പിച്ച ഗാന്ധിജയന്തി ആഘോഷത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം. മാറാട് പ്രശ്നത്തില്‍ ജുഡീഷ്യല്‍ അന്വേഷണം മതിയെന്ന് എല്ലാ രാഷ്ട്രീയപാര്‍ട്ടികളും ആവശ്യപ്പെട്ടതാണ്. അഭയകേസ്, ചേകന്നൂര്‍ മൗലവി കേസ് എന്നീ അന്വേഷണങ്ങളില്‍ സിബിഐയുടെ വിശ്വാസ്യത നഷ്ടപ്പെട്ട കാര്യം എല്ലാവര്‍ക്കും അറിയാമെന്നും മുരളീധരന്‍ പറഞ്ഞു.

ഖദറിട്ടവര്‍ കാവിയ്ക്ക് പിന്നാലെ പോകുന്നതിനേക്കാള്‍ എത്രയോ നല്ലതാണ് ഖദറിട്ടവര്‍ മാര്‍ക്സിസ്റുകാര്‍ക്ക് പിന്നാലെ പോകുന്നതെന്നും മുരളീധരന്‍ പറഞ്ഞു.

മുഖ്യമന്ത്രിയെ മാറ്റാന്‍ ഐ ഗ്രൂപ്പ് ആവശ്യപ്പെട്ടകാര്യം ചോദിച്ചപ്പോള്‍ കെപിസിസി പ്രസിഡന്റ് അക്കാര്യം ആവശ്യപ്പെട്ടില്ലെന്ന് മുരളീധരന്‍ പറഞ്ഞു. മുഖ്യമന്ത്രി തെരുവില്‍ പറഞ്ഞ കാര്യങ്ങള്‍ക്ക് മാത്രമേ താന്‍ മറുപടി പറഞ്ഞിട്ടുള്ളൂ എന്നും മുരളീധരന്‍ പറഞ്ഞു.