കരുണാകര വിരുദ്ധര്‍ യോഗം ചേര്‍ന്നു

തിരുവനന്തപുരം: ആന്റണിയ്ക്കെതിരായ കരുണാകരന്റെ നീക്കങ്ങള്‍ ചെറുക്കാന്‍ കോണ്‍ഗ്രസിലെ കരുണാകരവിരുദ്ധ ഗ്രൂപ്പുകളുടെ നേതാക്കള്‍ യോഗം ചേര്‍ന്നു. ഒക്ടോബര്‍ മൂന്ന് വെള്ളിയാഴ്ച തലേക്കുന്നില്‍ ബഷീറിന്റെ കൊച്ചാറിലുള്ള വീട്ടിലാണ് എ, മൂന്ന്, നാല് ഗ്രൂപ്പുകളിലുള്ളവര്‍ രാവിലെ യോഗം ചേര്‍ന്നത്. യോഗം ഇപ്പോഴും തുടരുകയാണ്.

കെപിസിസി പ്രസിഡന്റ് സ്ഥാനത്ത് നിന്ന് കെ. മുരളീധരനെ നീക്കുക എന്ന ആവശ്യം ഹൈക്കമാന്റിനോട് ഉന്നയിക്കാന്‍ യോഗത്തില്‍ ധാരണയായിട്ടുണ്ട്. വിവിധ ഗ്രൂപ്പുകളുടെ ആവശ്യം ഹൈക്കമാന്റിനെ അറിയിക്കാന്‍ യുഡിഎഫ് കണ്‍വീനര്‍ ഉമ്മന്‍ചാണ്ടി ദില്ലിയ്ക്ക് പോകും.

ഉമ്മന്‍ചാണ്ടി, ആര്യാടന്‍ മുഹമ്മദ്, തിരുവഞ്ചൂര്‍ രാധാകൃഷ്ണന്‍, എം.ഐ. ഷാനവാസ്, മന്ത്രിമാരായ ജി. കാര്‍ത്തികേയന്‍, കെ. സുധാകരന്‍, എഐസിസി ജനറല്‍ സെക്രട്ടറി രമേശ് ചെന്നിത്തല, കൊടിക്കുന്നില്‍ സുരേഷ് എന്നിവര്‍ യോഗത്തില്‍ പങ്കെടുക്കുന്നുണ്ട്. ഐ ഗ്രൂപ്പുകാരായ എം.പി. ഗംഗാധരനും മന്ത്രി കെ.വി. തോമസും യോഗത്തില്‍ പങ്കെടുക്കാനെത്തിയത് ശ്രദ്ധേയമായി.

കഴിഞ്ഞ ദിവസം കെ. മുരളീധരനും പിണറായി വിജയനും ഒരു യോഗത്തില്‍ പങ്കെടുത്തത് ഐ വിഭാഗം എല്‍ഡിഎഫിലേക്ക് നീങ്ങുന്നതിന്റെ സൂചനയാണെന്നും യോഗം വിലയിരുത്തി.