കേന്ദ്രം സാമ്പത്തികസംവരണത്തിന്

ദില്ലി: മുന്നാക്കവിഭാഗത്തിലെ സാമ്പത്തികമായി പിന്നാക്കം നില്ക്കുന്നവര്‍ക്ക് സര്‍ക്കാര്‍ ജോലിയില്‍ സംവരണം ഉറപ്പ് വരുത്താന്‍ ഭരണഘടനാഭേദഗതി കൊണ്ടുവരാന്‍ കേന്ദ്രനീക്കം. ഇതിനായി ഭരണഘടന ഭേദഗതി ചെയ്യാന്‍ കഴിഞ്ഞ ദിവസം ചേര്‍ന്ന കേന്ദ്രമന്ത്രിസഭായോഗം തീരുമാനിച്ചു.

സംസ്ഥാനസര്‍ക്കാരുകളുമായി ചര്‍ച്ച ചെയ്ത് ഇക്കാര്യത്തില്‍ രൂപരേഖ തയ്യാറാക്കും. ഇതിനായി സുപ്രീംകോടതി ജഡ്ജി ചെയര്‍മാനായി അഞ്ചംഗസമിതി രൂപവല്ക്കരിയ്ക്കും. മുന്നാക്കവിഭാഗത്തിലെ സാമ്പത്തികമായി പിന്നാക്കം നില്ക്കുന്നവര്‍ക്ക് സംവരണം ലഭിയ്ക്കാന്‍ ഭരണഘടനയിലെ 15(4), 16(4) എന്നീ വകുപ്പുകളാണ് ഭേദഗതി ചെയ്യുക. മൊത്തം സംവരണം 50 ശതമാനത്തില്‍ കൂടരുതെന്ന് ഇപ്പോള്‍ സുപ്രീംകോടതി നിര്‍ദേശമുണ്ട്. ഇത് മറികടക്കാന്‍ ഭരണഘടനയുടെ 16(4) വകുപ്പിന് ഒരു ഉപവകുപ്പ് കൂടി ഉള്‍പ്പെടുത്തും. സാമ്പത്തികമായി പിന്നാക്കം നില്ക്കുന്ന മുന്നാക്കവിഭാഗങ്ങള്‍ക്ക് ഉള്‍പ്പെടെ ആകെ എത്ര ശതമാനം സംവരണം ആകാമെന്ന് അതത് സംസ്ഥാനസര്‍ക്കാരുകളാണ് തീരുമാനിയ്ക്കേണ്ടത്.

സാമൂഹികമായും വിദ്യാഭ്യാസപരമായും പിന്നാക്കം നില്ക്കുന്നവര്‍ക്കും പട്ടികജാതി-വര്‍ഗ്ഗക്കാര്‍ക്കും പ്രത്യേകം ആനുകൂല്യങ്ങള്‍ നല്കുന്നതാണ് ഭരണഘടനയുടെ 15(4) വകുപ്പ്. ഇത് ഭേദഗതി ചെയ്ത് മുന്നാക്ക വിഭാഗത്തിലെ സാമ്പത്തികമായി പിന്നാക്കം നില്ക്കുന്നവര്‍ക്കും എന്ന് കൂടി ചേര്‍ക്കുമെന്ന് കേന്ദ്രമന്ത്രിസുഷമാ സ്വരാജ് അറിയിച്ചു.