സര്‍ക്കാര്‍ സമ്പൂര്‍ണ്ണപരാജയം: മുരളി

ദില്ലി: മാറാട് പ്രശ്നത്തില്‍ സിബിഐ അന്വേഷണത്തിന് വഴങ്ങിയ സര്‍ക്കാര്‍ സമ്പൂര്‍ണ്ണമായി പരാജയപ്പെട്ടിരിയ്ക്കുകയാണെന്ന് കെപിസിസി പ്രസിഡന്റ് കെ. മുരളീധരന്‍.

ദില്ലിയില്‍ കേരളത്തിന്റെ ചുമതലയുള്ള എഐസിസി സെക്രട്ടറി അഹമ്മദ് പട്ടേലുമായി ചര്‍ച്ച നടത്തിയ ശേഷം വാര്‍ത്താലേഖകരോട് പ്രതികരിയ്ക്കുകയായിരുന്നു അദ്ദേഹം. ഭാഗിക സിബിഐ അന്വേഷണം എന്നൊന്ന് ഇല്ല. സിബിഐ അന്വേഷണം എന്ന് പറഞ്ഞാല്‍ മാറാട് പ്രശ്നത്തെക്കുറിച്ച് സിബിഐ അന്വേഷിയ്ക്കുന്നു എന്ന് തന്നെയാണ്.- മുരളീധരന്‍ പറഞ്ഞു.

കോണ്‍ഗ്രസ് പ്രശ്നപരിഹാരത്തിന് എന്തെങ്കിലും ഫോര്‍മുല ഉരുത്തിരിഞ്ഞോ എന്ന ചോദ്യത്തിന് പ്രശ്നപരിഹാരത്തിന് ഏതെങ്കിലും വഴിയുണ്ടോ അത് സ്വീകരിയ്ക്കുമെന്ന് മുരളീധരന്‍ പറഞ്ഞു.

എറണാകുളം ഉപതിരഞ്ഞെടുപ്പിന്റെ പേരില്‍ ഐ ഗ്രൂപ്പിലെ ആര്‍ക്കെതിരെയും നടപടിയെടുക്കരുതെന്ന കാര്യം ഹൈക്കമാന്റിനോട് ആവശ്യപ്പെട്ടിട്ടുണ്ടെന്നും മുരളീധരന്‍ പറഞ്ഞു. ഇനി എല്‍.പി. സാഹി, ആര്‍.കെ. ധവാന്‍ എന്നിവരുമായി കൂടിക്കാഴ്ച നടത്തുമെന്നും മുരളി പറഞ്ഞു.