ഹൈക്കമാന്റില്‍ അഭിപ്രായഭിന്നത

ദില്ലി: എറണാകുളം ഉപതിരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ത്ഥിയുടെ പരാജയത്തെക്കുറിച്ച് അന്വേഷിയ്ക്കുന്ന എല്‍.പി. സാഹി കമ്മിറ്റിയില്‍ അഭിപ്രായഭിന്നത.

കമ്മിറ്റി ചെയര്‍മാന്‍ സാഹിയും കമ്മിറ്റിയില്‍ അംഗമായ ആര്‍.കെ. ധവാനുമാണ് പരസ്പരവിരുദ്ധമായി പ്രസ്താവനകള്‍ നടത്തുന്നത്. കമ്മിറ്റിയ്ക്ക് റിപ്പോര്‍ട്ട് സമര്‍പ്പിയ്ക്കാന്‍ സമയപരിധി നിശ്ചയിച്ചിട്ടില്ലെന്ന് ആര്‍.കെ. ധവാന്‍ പറഞ്ഞപ്പോള്‍, വേണമെങ്കില്‍ രണ്ടാഴ്ചയ്ക്കകം റിപ്പോര്‍ട്ട് നല്കാമെന്ന് ചെയര്‍മാന്‍ എല്‍.പി. സാഹി പറയുന്നു.

കേരളത്തിന്റെ ചുമതലയുള്ള എഐസിസി സെക്രട്ടറി അഹമ്മദ് പട്ടേലും ധവാനും തമ്മിലും പല കാര്യങ്ങളില്‍ ഭിന്നാഭിപ്രായങ്ങളാണ് പറയുന്നത്. നേതൃമാറ്റത്തെക്കുറിച്ച് ചര്‍ച്ചയില്ലെന്ന് അഹമ്മദ് പട്ടേല്‍ പറയുമ്പോള്‍ പ്രശ്നം ആരെങ്കിലും ഉന്നയിച്ചാല്‍ ചര്‍ച്ചയാവാമെന്നാണ് ധവാന്റെ നിലപാട്.

കേരളത്തിന്റെ പ്രശ്നങ്ങള്‍ പഠിയ്ക്കാന്‍ പോയ നിരീക്ഷകര്‍ റിപ്പോര്‍ട്ട് നല്കിയില്ലെന്ന് ധവാന്‍ പറയുന്നു. അതേ സമയം നിരീക്ഷകരായ ജി.കെ. വാസന്‍, വീരപ്പമൊയ്ലി എന്നിവര്‍ റിപ്പോര്‍ട്ട് നല്കിയിട്ടുണ്ടെന്ന് അഹമ്മദ് പട്ടേല്‍ പറയുന്നു.