ലീഗ് സെക്രട്ടേറിയറ്റ് യോഗം തുടങ്ങി
തിരുവനന്തപുരം: മുസ്ലിം ലീഗ് സംസ്ഥാന സെക്രട്ടേറിയറ്റ് യോഗം ഒക്ടോബര് എഴ് ചൊവാഴ്ച പാണക്കാട്ട് ശിഹാബ് തങ്ങളുടെ വീട്ടില് ആരംഭിച്ചു.
മുസ്ലിം ലീഗ് മന്ത്രിമാരായ പി.കെ. കുഞ്ഞാലിക്കുട്ടി, എം.കെ. മുനീര്, നാലകത്ത് സൂപ്പി, ചെര്ക്കളം അബ്ദുള്ള എന്നിവരും മുസ്ലിംലീഗ് അഖിലേന്ത്യാ നേതാവ് ഇ. അഹമ്മദ്, പി.കെ.കെ. ബാവ എംഎല്എ എന്നിവര് പങ്കെടുക്കുന്നുണ്ട്.
ലീഗ് സെക്രട്ടേറിയറ്റിലെ 18 അംഗങ്ങളില് അബ്ദുള് സമദ് സമദാനി എംപി ഒഴികെ എല്ലാവരും യോഗത്തില് പങ്കെടുക്കുന്നുണ്ട്.
സംസ്ഥാനഭരണത്തിനെതിരെ രൂക്ഷമായ വിമര്ശനം ഉയര്ത്തിക്കൊണ്ട് പാണക്കാട് ശിഹാബ് തങ്ങളാണ് ചര്ച്ചകള്ക്ക് തുടക്കം കുറിച്ചത്. ഭരണം ഇന്നത്തെ രീതിയില് തുടര്ന്നാല് ജനങ്ങളില് നിന്ന് തിരിച്ചടിയുണ്ടാകുമെന്ന ആമുഖത്തോടെയാണ് പാണക്കാട് ശിഹാബ് തങ്ങള് പ്രസംഗം ആരംഭിച്ചത്.
ദില്ലിയില് മുരളീധരനും സോണിയാഗാന്ധിയും തമ്മിലുള്ള കൂടിക്കാഴ്ചയുടെ റിപ്പോര്ട്ട് പുറത്ത് വന്നശേഷമേ മുസ്ലിം ലീഗ് സെക്രട്ടറിയേറ്റ് യോഗം എന്തെങ്കിലും പ്രതികരണം അറിയിക്കൂ എന്നും കരുതുന്നു. എറണാകുളം ഉപതിരഞ്ഞെടുപ്പിലെ തോല്വി, ഇതിന് മുഖ്യമന്ത്രിയുള്പ്പെടെയുള്ളവര് ലീഗിനെതിരെ ഉന്നയിച്ച ആരോപണം, മാറാട് ഒത്തുതീര്പ്പ് തുടങ്ങിയ വിഷയങ്ങള് ചര്ച്ചയില് ഉയര്ന്നുവരും. ഈ യോഗത്തില് കൂടുതല് തുറന്ന ചര്ച്ചയുണ്ടാകുമെന്നാണ് കരുതുന്നത്.