കരുണാകരന്‍ സോണിയയുമായി ചര്‍ച്ച നടത്തി

ദില്ലി: മുതിര്‍ന്ന കോണ്‍ഗ്രസ് നേതാവ് കെ. കരുണാകരന്‍ എ ഐ സി സി അധ്യക്ഷ സോണിയാഗാന്ധിയുമായി ചര്‍ച്ച നടത്തി. കേരളത്തിന്റെ ചുമതലയുള്ള എ ഐ സി സി ജനറല്‍ സെക്രട്ടറി അഹമ്മദ് പട്ടേലിന്റെ സാന്നിധ്യത്തിലായിരുന്നു ചര്‍ച്ച.

ചര്‍ച്ചയുടെ വിശദാംശങ്ങള്‍ വാര്‍ത്താ ലേഖകരോട് കരുണാകരന്‍ വെളിപ്പെടുത്തിയില്ല. നേതൃമാറ്റം വേണമെന്ന ആവശ്യത്തില്‍ നിന്ന് പിന്മാറുന്ന പ്രശ്നമില്ലെന്ന് കരുണാകരന്‍ വ്യക്തമാക്കി.

നവംബര്‍ 19നുള്ളില്‍ അന്തിമ തീരുമാനം കൈകൊള്ളണമെന്ന അന്ത്യശാസനം നല്‍കിയിട്ടില്ലെന്ന് കരുണാകരന്‍ പറഞ്ഞു. ഇന്ദിരാഗാന്ധിയുടെ ജന്മദിനമെന്ന നിലയിലാണ് നവംബര്‍ 19ന് റാലി നടത്തുന്നത്. അന്ന് പ്രത്യേകിച്ച് തീരുമാനങ്ങളൊന്നും കൈകൊള്ളില്ല.

സോണിയയുമായുള്ള കൂടിക്കാഴ്ചക്ക് മുമ്പ് അഹമ്മദ് പട്ടേല്‍ കരുണാകരന്റെ വീട്ടിലെത്തി ഒരു മണിക്കൂറോളം ചര്‍ച്ച നടത്തി. സാഹി കമ്മിറ്റിയുമായും കരുണാകരന്‍ ചര്‍ച്ച നടത്തിയേക്കും.