മട്ടാഞ്ചേരി: ചുങ്കവര്ധന 30 ദിവസത്തേക്ക് നിര്ത്തി
കൊച്ചി: മട്ടാഞ്ചേരി പാലത്തിലെ ചുങ്കവര്ധനവ് 30 ദിവസത്തേക്ക് നിര്ത്തിവച്ചു. ചുങ്കം വര്ധിപ്പിച്ചതിനെ തുടര്ന്നുണ്ടായ പ്രശ്നം പരിഹരിക്കാന് വിദഗ്ധ ഏജന്സി പഠനം നടത്തി 30 ദിവസത്തിനുള്ളില് ശുപാര്ശ സമര്പ്പിക്കും.
ചുങ്കപ്പിരിവ് പിന്വലിക്കണമെന്ന് ആവശ്യപ്പെട്ട് സമരം നടത്തുന്ന ബസ്സുടമകളുമായി മന്ത്രിസഭാ ഉപസമിതി നടത്തിയ ചര്ച്ചയിലാണ് ഈ തീരുമാനമുണ്ടായത്. അഡീഷണല് ചീഫ് സെക്രട്ടറിയുടെ മേല്നോട്ടത്തിലുള്ള വിദഗ്ധ സമിതി പഠനം നടത്തി ചുങ്കനിരക്കില് കുറവ് വരുത്താനായി കരാറില് വരുത്തേണ്ട മാറ്റം സംബന്ധിച്ച് ശുപാര്ശ നല്കും. ഈ നിര്ദേശം ഉപസമിതി മന്ത്രിസഭയ്ക്ക് മുന്നില് വയ്ക്കും. 30 ദിവസത്തിനുള്ളില് മന്ത്രിസഭയുടെ തീരുമാനമുണ്ടാവും.
30 ദിവസം പഴയനിരക്കില് തന്നെയായിരിക്കും ചുങ്കം പിരിക്കുക. ബസുകള് എത്ര തവണ ഓടിയാലും ദിവസം 100 രൂപ ചുങ്കം നല്കിയാല് മതി. കാറുകള് പോലുള്ള ചെറിയ വാഹനങ്ങള് ദിവസം 10 രൂപ നല്കണം. ഒരു തവണ മാത്രമോടുന്ന മറ്റ് വാഹനങ്ങള്ക്ക് 47.5 രൂപയാണ് ചുങ്കം.
സര്ക്കാരിന്റെ നിര്ദേശങ്ങള് കൊച്ചിയില് ഒക്ടോബര് 14 ചൊവാഴ്ച നടക്കുന്ന സംയുക്ത സമര സമിതിയുടെ യോഗത്തില് വയ്ക്കുമെന്ന് ബസുടമകള് പറഞ്ഞു.
മന്ത്രിസഭാ ഉപസമിതി അംഗങ്ങളായ ആര്. ബാലകൃഷ്ണപിള്ള, ടി. എം. ജേക്കബ്, ചെര്ക്കളം അബ്ദുള്ള, എം. കെ. മുനീര്, കെ. വി. തോമസ്, എം എല് എമാരായ വി. കെ. ഇബ്രാഹിം കുഞ്ഞ്, ഡൊമിനിക് പ്രസന്റേഷന്, ബസുടമകള് തുടങ്ങിയവര് ചര്ച്ചയില് പങ്കെടുത്തു.