സ്പീക്കര്‍ക്കെതിരെ പ്രമേയത്തിന് നോട്ടീസ് നല്‍കും

തിരുവനന്തപുരം: സ്പീക്കര്‍ വക്കം പുരുഷോത്തമനെതിരെ നിയമസഭയില്‍ അവിശ്വാസ പ്രമേയത്തിന് നോട്ടീസ് നല്‍കുന്നതിന് എല്‍ ഡി എഫ് സംസ്ഥാന സമിതി തീരുമാനിച്ചു.

സി പി എം നിയമസഭാ സമിതി ഉപനേതാവ് കോടിയേരി ബാലകൃഷ്ണനായിരിക്കും പ്രമേയത്തിന് നോട്ടീസ് നല്‍കുന്നത്. യു ഡി എഫിലെ ഒരു വിഭാഗത്തിന്റെ പിന്തുണ പ്രമേയത്തിന് ലഭിക്കുമെന്നാണ് പ്രതീക്ഷിക്കുന്നതെന്ന് ഇടതുമുന്നണി കണ്‍വീനര്‍ പാലൊളി മുഹമ്മദുകുട്ടി പറഞ്ഞു.

ഒരു സാധാരണ കോണ്‍ഗ്രസുകാരന്റെ നിലയിലേക്ക് സ്പീക്കര്‍ തരംതാഴ്ന്നിരിക്കുകയാണ്. കോണ്‍ഗ്രസ് എം എല്‍ എമാര്‍ക്ക് തന്നെ വക്കത്തിന്റെ രീതികളോട് യോജിപ്പില്ല- പാലൊളി ചൂണ്ടിക്കാട്ടി.

ആന്റണി മന്ത്രിസഭയെ താഴെയിറക്കുന്നതിനുള്ള കോണ്‍ഗ്രസിലെ ഒരു വിഭാഗത്തിന്റെ ശ്രമങ്ങള്‍ക്ക് പിന്തുണ നല്‍കുന്നതിനെ കുറിച്ചും യോഗം ചര്‍ച്ച ചെയ്തു. വക്കത്തിനെതിരായ അവിശ്വാസ പ്രമേയം അവതരിപ്പിക്കുമ്പോള്‍ യു ഡി എഫിലെ ഒരു വിഭാഗത്തിന്റെ നിലപാട് വ്യക്തമാവുമെന്ന് യോഗം വിലയിരുത്തി.