ആന്റണി ശൈലി മാറ്റണമെന്ന് ഇ. അഹമ്മദ്

ദില്ലി: മുഖ്യമന്ത്രി എ. കെ. ആന്റണിയുടെ ഭരണശൈലി മാറണമെന്നാണ് കേരളത്തിലെ ജനങ്ങള്‍ ആഗ്രഹിക്കുന്നതെന്ന് മുസ്ലിം ലീഗ് അഖിലേന്ത്യാ ജനറല്‍ സെക്രട്ടറി ഇ. അഹമ്മദ് പറഞ്ഞു.

ഒക്ടോബര്‍ 20 തിങ്കളാഴ്ച എ ഐ സി സി പ്രസിഡന്റ് സോണിയാഗാന്ധിയുമായി കൂടിക്കാഴ്ച നടത്തിയ ശേഷം വാര്‍ത്താ ലേഖകരോട് സംസാരിക്കുകയായിരുന്നു അഹമ്മദ്. മുഖ്യമന്ത്രി എ. കെ. ആന്റണി സോണിയയെ സന്ദര്‍ശിക്കുന്നതിന് മുമ്പായാണ് അഹമ്മദ് ചര്‍ച്ച നടത്തിയത്.

കേരളത്തിലെ നേതൃമാറ്റം സംബന്ധിച്ച് കോണ്‍ഗ്രസ് ഹൈക്കമാന്റ് അഭിപ്രായം ചോദിച്ചാല്‍ ലീഗിന്റെ നിലപാട് അറിയിക്കുമെന്ന് ഒരു ചോദ്യത്തിന് മറുപടിയായി അഹമ്മദ് പറഞ്ഞു. മുഖ്യമന്ത്രിയുടെ ശൈലി മാറണമെന്ന് ലീഗ് പ്രമേയം പാസാക്കിയിട്ടുണ്ട്. കേരളത്തിലെ ജനങ്ങളും അതാണ് ആഗ്രഹിക്കുന്നത്. കോണ്‍ഗ്രസിലെ പ്രശ്നങ്ങള്‍ ഐക്യജനാധിപത്യ മുന്നണിയുടെ പ്രവര്‍ത്തനത്തെ ദോഷകരമായി ബാധിച്ചിട്ടുണ്ട്.

അഹമ്മദിന് പിന്നാലെ മന്ത്രി കെ. സുധാരകരനും സോണിയയെ കണ്ടു. എറണാകുളം ഉപതിരഞ്ഞെടുപ്പില്‍ ഐ വിഭാഗം നേതാക്കള്‍ നടത്തിയ വിമതപ്രവര്‍ത്തനത്തിന് തെളിവെന്ന നിലയില്‍ ഒരു വീഡിയോ കാസറ്റ് സുധാകരന്‍ സോണിയക്ക് നല്‍കി. കഴിഞ്ഞ ദിവസം ഈ കസറ്റ് സുധാകരന്‍ അഹമ്മദ് പട്ടേലിനും നല്‍കിയിരുന്നു.